Qashqadaryo viloyati hokimligi Yoshlar ishlari agentligining viloyat boshqarmasi boshlig‘i Shohjahon Omonovning ishdan olinmaganini ma’lum qildi. Bu haqda hokimlik axborot xizmatining Telegramdagi rasmiy kanalida xabar berildi.
Ta’kidlanishicha, Shohjahon Omonovga oxirgi imkoniyat berilgan.
Viloyat hokimligi axborot xizmati rahbari Ahror Sodiqovga ko‘ra, Yoshlar ishlari agentligi direktori Alisher Sa’dullayev ishtirokidagi 2021-yilning 5-mart kuni boshqarma binosida bo‘lib o‘tgan yig‘ilishda Shohjahon Omonovga so‘nggi imkoniyat berilgan. “Daryo” manbalari esa, o‘sha kungi yig‘ilishda Alisher Sa’dullayev Shohjahon Omonovni ishdan olganini, o‘rniga boshqarma boshlig‘i o‘rinbosari Temur Poyonovni uch oylik sinov davri bilan vazifaga tayinlaganini aytgandi.
Shuningdek, agentlik direktori Alisher Sa’dullayev “Daryo” muxbiri bilan muloqotida boshqarma boshlig‘ini ishdan olishga qaror qilganini, ammo bu haqda rasmiy hujjatlarga imzo chekmaganini bildirgandi.
“Daryo” manbalarining qo‘shimcha qilishicha, lavozimida qolgani aytilayotgan Shohjahon Omonov kecha agentlikning barcha xodimlari, tuman va shahar bo‘limi rahbarlari bilan xayrlashgan. Shuningdek, bugun, 6-mart kuni ham ishga chiqmagan.
Bu haqdagi so‘rovimizga boshqarma boshlig‘i vazifasini bajarishga kirishgani aytilgan Temur Poyonov “Men bugun Mirishkor tumanida bo‘ldim. Ishlarim bilan yuribman. Boshlig‘imizning bugun ishga chiqqan yoki chiqmaganidan xabarim yo‘q. Qolaversa, bugun dam olish kuni bo‘lsa”, deya javob berdi.
Temur Poyonovning javobidan so‘ng savol tug‘iladi. Xo‘sh, bugun dam olish kuni bo‘lsa, unda nega boshqarma boshlig‘i o‘rinbosari boshchiligidagi xodimlar ishda-yu, boshqarma boshlig‘i dam olishda? Viloyat hokimligi axborot xizmati aytgan gapga ishonsak, unda boshqarma boshlig‘i Shohjahon Omonov nega xodimlari bilan xayrlashgan? Nega bugun ish joyida ko‘rinmagan?
O‘ylaymizki, mazkur savollarga agentlik direktori Alisher Sa’dullayev tez orada aniqlik kiritadi.
Izoh (0)