Qoraqalpog‘istonda bir oilaning 4 a’zosi va mehmon is gazidan zaharlanib, vafot etdi

Qoraqalpog‘istonda besh nafar, jumladan, ikki voyaga yetmagan shaxs vafot etdi, deya xabar qilmoqda respublika prokuraturasi.

Qayd etilishicha, 2021-yil 6-mart kuni soat 11:30 larda To‘rtko‘l tumani IIBga kelib tushgan xabarga ko‘ra, To‘rtko‘l tumani, “Yangiobod” MFYda yashovchi fuqaro I.U.(erkak) va uning qizlari R.S. (2003-yilda tug‘ilgan), R.A. (2010-yilda tug‘ilgan) va o‘g‘li R.M. (2005-yilda tug‘ilgan) hamda ushbu xonadonga mehmonga kelgan A.Sh. xonadonda o‘rnatilgan isitish pechidan sizib chiqqan is gazidan zaharlanib, vafot etgan.

Ushbu holat yuzasidan To‘rtko‘l tuman prokuraturasi tomonidan Jinoyat kodeksining 259-moddasi 2-qismi “a, b” bandlari bilan jinoyat ishi qo‘zg‘atildi.

Hozirda To‘rtko‘l tumani IIB tomonidan dastlabki tergov harakatlari olib borilmoqda.

Mazkur jinoyat ishining tergovi Qoraqalpog‘iston prokuraturasi tomonidan nazoratga olingan.

Bundan avval Xorazmdagi choyxonada bir oilaning uch a’zosi is gazidan zaharlanib vafot etgani, Kattaqo‘rg‘onda is gazidan oilaviy zaharlanish oqibatida uch nafar bola halok bo‘lgani hamda Sirdaryoda er-xotin is gazidan zaharlanish oqibatida vafot etgani haqida xabar berilgandi.