Farg‘onada fuqaroning katta miqdordagi pullarini aldov yo‘li bilan o‘zlashtirib, xorijga chiqib ketgan shaxsga nisbatan jinoiy ish ochildi, deya xabar qilmoqda Tergov departamenti.
Qayd etilishicha, 2020-yilning iyul oyidan dekabr oyiga qadar bo‘lgan vaqt oralig‘ida 31 yoshli H.T. Qo‘qon shahrining turli hududlarida tanishi 38 yoshli K.I.ga bank tizimi pul o‘tkazmalari orqali pullarini aylantirib, ko‘p foyda olishi mumkinligiga qiziqtiradi.
Shundan so‘ng H.T. K.I.dan jami 71 200 AQSh dollar va 1 milliard 9 million 258 ming so‘m pul mablag‘larini aldov yo‘li bilan olib, ushbu pullarni ehtiyojlariga sarflab yuboradi.
Mazkur holat yuzasidan Qo‘qon shahri bo‘yicha IIO FMB Tergov bo‘limi tomonidan H.T.ga nisbatan Jinoyat kodeksining 168-moddasi 4-qismi “a” bandi (firibgarlik yo‘li bilan juda koְ’p miqdorda o‘zganing mulkiga ega chiqish) bilan jinoyat ishi qo‘zg‘atilgan.
Olib borilgan tergov harakatlari jarayonida aniqlanishicha, K.I. Qo‘qon shahrida joylashgan xususiy korxona rahbari bo‘lib, “Agrobank” Qo‘qon shahri filiali mijozi ekanligini aytgan. U ushbu bank xodimi H.T. bilan ancha yildan beri tanish bo‘lib, unga 20 000 AQSh dollar qarz berganida, H.T. ushbu pullarni bankka qo‘yib foyda olishini aytib, uni qiziqtirib bir oylik foydaning yarmi deb boshlanishiga 2 250 000 so‘m pul olib kelib bergan.
Keyinchalik H.T. K.I.dan olgan pullari evaziga foydasi deb jami 240 000 000 so‘m pul mablag‘lari berib, u ham qiziqib yanada ko‘proq pul berib borgan. Oradan ma’lum bir vaqt o‘tib, H.T. xorijga chiqish pasportini olib Qirg‘izistonga chiqib ketib qolgan, undan olgan pullarini bankka qo‘ymasdan ehtiyojlariga sarflab, bir qismiga yer uchastkasi sotib olib, bir qismini tanish ayoliga bergan.
Hozirda H.T.ni ushlash choralari ko‘rilmoqda.
Bundan avval Toshkentda 15 ming dollar evaziga “Narxoz”ga o‘qishga kiritib qo‘yishni va’da qilgan shaxs ushlangani, Janubiy Koreyaga ishlash uchun yuborishini va’da qilib, o‘zbekistonlikni 57 ming dollarga chuv tushirgan koreyalik qo‘lga olingani hamda Toshkentda tadbirkorning 1,9 mlrd so‘mini qo‘lga kiritgan firibgarga jinoyat ishi qo‘zg‘atilgani haqida xabar berilgandi.
Izoh (0)