Қашқадарё вилояти ҳокимлиги Ёшлар ишлари агентлигининг вилоят бошқармаси бошлиғи Шоҳжаҳон Омоновнинг ишдан олинмаганини маълум қилди. Бу ҳақда ҳокимлик ахборот хизматининг Telegramдаги расмий каналида хабар берилди.
Таъкидланишича, Шоҳжаҳон Омоновга охирги имконият берилган.
Вилоят ҳокимлиги ахборот хизмати раҳбари Аҳрор Содиқовга кўра, Ёшлар ишлари агентлиги директори Алишер Саъдуллаев иштирокидаги 2021 йилнинг 5 март куни бошқарма биносида бўлиб ўтган йиғилишда Шоҳжаҳон Омоновга сўнгги имконият берилган. «Дарё» манбалари эса, ўша кунги йиғилишда Алишер Саъдуллаев Шоҳжаҳон Омоновни ишдан олганини, ўрнига бошқарма бошлиғи ўринбосари Темур Поёновни уч ойлик синов даври билан вазифага тайинлаганини айтганди.
Шунингдек, агентлик директори Алишер Саъдуллаев «Дарё» мухбири билан мулоқотида бошқарма бошлиғини ишдан олишга қарор қилганини, аммо бу ҳақда расмий ҳужжатларга имзо чекмаганини билдирганди.
«Дарё» манбаларининг қўшимча қилишича, лавозимида қолгани айтилаётган Шоҳжаҳон Омонов кеча агентликнинг барча ходимлари, туман ва шаҳар бўлими раҳбарлари билан хайрлашган. Шунингдек, бугун, 6 март куни ҳам ишга чиқмаган.
Бу ҳақдаги сўровимизга бошқарма бошлиғи вазифасини бажаришга киришгани айтилган Темур Поёнов «Мен бугун Миришкор туманида бўлдим. Ишларим билан юрибман. Бошлиғимизнинг бугун ишга чиққан ёки чиқмаганидан хабарим йўқ. Қолаверса, бугун дам олиш куни бўлса», дея жавоб берди.
Темур Поёновнинг жавобидан сўнг савол туғилади. Хўш, бугун дам олиш куни бўлса, унда нега бошқарма бошлиғи ўринбосари бошчилигидаги ходимлар ишда-ю, бошқарма бошлиғи дам олишда? Вилоят ҳокимлиги ахборот хизмати айтган гапга ишонсак, унда бошқарма бошлиғи Шоҳжаҳон Омонов нега ходимлари билан хайрлашган? Нега бугун иш жойида кўринмаган?
Ўйлаймизки, мазкур саволларга агентлик директори Алишер Саъдуллаев тез орада аниқлик киритади.
Изоҳ (0)