Estoniya bosh vaziri Kaya Kallas koronavirus bilan kasallangan odam bilan aloqada bo‘lganidan so‘ng 5-martdan boshlab o‘zini izolyatsiya qildi. Bu haqda “Interfaks” xabar berdi.
“Men bugun (juma) COVID-19 testi ijobiy chiqqan odam bilan haftaning boshida aloqada bo‘lganimni bildim”, — deb yozgan bosh vazir Facebook sahifasida. Shu sababli Kallas 11-martgacha izolyatsiya qilinadi.
Vazirning aytishicha, 4-mart kuni topshirgan testida koronavirus aniqlanmadi.
“Men o‘zimni yaxshi his qilyapman, virus simptomlari yo‘q. Ishimni masofaviy davom ettiraman va Sog‘liqni saqlash departamentining ko‘rsatmalariga amal qilaman. Iltimos, ijtimoiy masofani saqlang, atrofdagilar bilan aloqalarni qisqartiring va sog‘lig‘ingizga e’tiborli bo‘ling”, — dedi Kallas.
Estoniya hukumatining matbuot xizmatiga ko‘ra, mart oyida Vazirlar mahkamasi va hukumat majlislari videoaloqa orqali o‘tkaziladi.
Avvalroq AQSh dengiz kuchlarining ikkita harbiy kemasida koronavirus qayd etilgani haqida xabar berilgan edi.
Izoh (0)