Эстония бош вазири Кая Каллас коронавирус билан касалланган одам билан алоқада бўлганидан сўнг 5 мартдан бошлаб ўзини изоляция қилди. Бу ҳақда «Интерфакс» хабар берди.
«Мен бугун (жума) COVID-19 тести ижобий чиққан одам билан ҳафтанинг бошида алоқада бўлганимни билдим», — деб ёзган бош вазир Facebook саҳифасида. Шу сабабли Каллас 11 мартгача изоляция қилинади.
Вазирнинг айтишича, 4 март куни топширган тестида коронавирус аниқланмади.
«Мен ўзимни яхши ҳис қиляпман, вирус симптомлари йўқ. Ишимни масофавий давом эттираман ва Соғлиқни сақлаш департаментининг кўрсатмаларига амал қиламан. Илтимос, ижтимоий масофани сақланг, атрофдагилар билан алоқаларни қисқартиринг ва соғлиғингизга эътиборли бўлинг», — деди Каллас.
Эстония ҳукуматининг матбуот хизматига кўра, март ойида Вазирлар маҳкамаси ва ҳукумат мажлислари видеоалоқа орқали ўтказилади.
Аввалроқ АҚШ денгиз кучларининг иккита ҳарбий кемасида коронавирус қайд этилгани ҳақида хабар берилган эди.
Изоҳ (0)