“Liverpul” o‘z tarixida ilk bor ketma-ket 5 ta uy o‘yinida yutqazdi

“Liverpul” Premyer Liga 29-turi doirasida kechgan 4-mart kungi o‘yinda “Chelsi”ga yutqazib qo‘ydi (0:1).

Yurgen Klopp qo‘l ostidagi jamoa “Enfild”da ketma-ket beshta o‘yinda mag‘lubiyatga uchradi.  Avvalroq jamoa “Byornli” (0:1), “Brayton” (0:1), “Manchester Siti” (1:4) va “Everton”ga (0:2) o‘z uyida yutqazgandi.

“Qizillar” o‘z tarixida ilk bor ketma-ket beshta uy o‘yinida mag‘lub bo‘ldi, deya xabar qilmoqda Opta. Shuningdek, “Liverpul” Premyer Liga doirasida o‘z maydonida besh o‘yinlik mag‘lubiyatli seriya qayd etgan ilk amaldagi chempion bo‘ldi.

“Liverpul” umumiy olganda “Enfild”da yettita uchrashuvdan beri g‘alaba qozona olmayapti. So‘nggi bor jamoa 16-dekabrda “Tottenhem”ni mag‘lub etgandi (2:1).

Mersisaydliklar keyingi uy o‘yinini 7-mart kuni “Fulhem”ga qarshi o‘tkazadi.