Olmaliq shahar hokimligi ijtimoiy tarmoqlarda shaharning 5/2 dahasida 7 yoshli qizchani o‘g‘irlab ketishga urinishda gumonlangan fuqaro bilan bog‘liq holat tasvirlangan videoga munosabat bildirdi.
Qayd etilishicha, 2021-yil 2-mart kuni 1961-yilda tug‘ilgan M.Q. ismli fuqaro ukasining “Toshkent” mahallasidagi xonadonlarning birida tug‘ilgan kunini nishonlash uchun borib, u yerda spirtli ichimlik iste’mol qilgan. Soat 19:00 larda M.Q. uyiga qaytib kelayotgan vaqt oshqozoni qattiq og‘rigani uchun “Yangi hayot” mahallasi, 27-uy yo‘lagiga kirib, zinada o‘tirib qolgan.
Shu vaqt 27-uydagi xonadonda yashovchi, voyaga yetmagan, 2014-yilda tug‘ilgan qizcha do‘kondan tuz olib kelayotganligi va uy yo‘lagida o‘tirgan notanish shaxsni ko‘rib, qo‘rqqani sababli, ichkariga kira olmasdan turganida, uning dadasi kelib qolgan. Qizning dadasi bu holatni noto‘g‘ri tushungan va o‘sha joydayoq shahar IIBga murojaat qilgan. Ushbu holatni oilaning qo‘shnisi J.M. videoga olgan.
Shundan so‘ng, sodir bo‘lgan voqeadan bexabar D.A. tanishi J.M.ning telefonidagi videotasvirni o‘z telefoniga ko‘chirib olib, M.Q. yosh bolalarni o‘g‘irlash bilan shug‘ullanib kelayotgani haqida sharh bilan Telegram ijtimoiy tarmog‘i orqali tarqatib yuborgan.
Fuqaro M.Q. tomonidan voyaga yetmagan qizga tegmagan, unga tan jarohati yetkazmagan va uyatsiz-buzuq harakatlar sodir etmagan. Mazkur holat bo‘yicha hozirda Olmaliq shahar IIB tomonidan tergovga qadar tekshiruv o‘tkazilmoqda.
Avvalroq Toshkentda liftda voyaga yetmagan qizlarga tegajog‘lik qilgan erkak 1,5 yilga qamalgani to‘g‘risida xabar berilgandi.
Izoh (0)