O‘zbekiston Prezidentining “Elektrotexnika sanoatini yanada rivojlantirish va mahalliy mahsulotlarning raqobatbardoshligini oshirishga doir qo‘shimcha chora-tadbirlar to‘g‘risida”gi qarori bilan mamlakatdagi elektrotexnika va eletromaishiy mahsulotlarni ishlab chiqaruvchilar yangi imtiyozlarga ega bo‘ldi, deb xabar beradi O‘zA.
Xususan, 2021-yil 1-apreldan 2024-yil 1-yanvarga qadar muddatga hisobot davri yakunlari bo‘yicha elektrotexnika mahsulotlarini sotishdan tushgan tushumi miqdori umumiy tushumining 80 foizidan kam bo‘lmagan elektrotexnika tarmog‘i korxonalariga foyda solig‘i va mol-mulk solig‘i bo‘yicha stavkalarni 50 foizga kamaytirish tarzida soliq imtiyozlari beriladi.
Shu bilan birga, soliq imtiyozlari berilishi munosabati bilan bo‘shagan mablag‘lar korxonalar tomonidan dividendlar ko‘rinishida taqsimlanmaydi, yangi ishlab chiqarish quvvatlarini yaratish va mavjud quvvatlarni modernizatsiya qilishga yo‘naltiriladi.
Shuningdek, qaror bilan Moliya vazirligiga manfaatdor vazirlik va idoralar bilan birgalikda ikki oy muddatda davlat dasturlari doirasida xalqaro moliya institutlari va xorijiy hukumat moliya tashkilotlari mablag‘lari hisobidan, bundan tashqari, davlat-xususiy sheriklik shartlarida amalga oshiriladigan loyihalar bo‘yicha tanlov (tender) o‘tkazilganda mahalliy mahsulotlar sotib olinishini nazarda tutuvchi “milliy kontent” tizimini joriy etish yuzasidan takliflarni tayyorlash vazifasi qo‘yilgan.
Bundan tashqari, Eksportni rag‘batlantirish agentligi 2024-yil 1-yanvarga qadar elektrotexnika va elektromaishiy mahsulotlarni barcha mamlakatlarga, shu jumladan, qo‘shni davlatlarga eksport qilishda avtomobil, temiryo‘l va havo transportida tashish xarajatlarining 50 foizini, biroq mahsulotlar eksport qiymatining (transport xarajatlarisiz) avtomobil transportida 15 foizidan, temiryo‘l transportida 20 foizidan ko‘p bo‘lmagan miqdorda qoplashga subsidiyalar taqdim etadi.
Elektrotexnika sanoatini rivojlantirish jamg‘armasi mablag‘lari hisobidan tarmoq korxonalarining tashqi bozorlarda o‘z mahsulotlarining jozibadorligini oshirish bo‘yicha marketing tadqiqotlari olib borishi, tarmoq loyihalarining loyihaoldi hujjatlarini (biznes-rejalar, texnik-iqtisodiy asoslar va boshqalar) ishlab chiqishi, shuningdek, jahon bozorini o‘rganish va marketing tahlillarini amalga oshirish uchun xalqaro ma’lumotlar bazalariga (axborot resurslariga) ulanishi bilan bog‘liq xarajatlarining 50 foizigacha qismini qoplaydi.
Hujjat bilan 2022-yil mart oyidan boshlab har yili mahalliy va xorijiy korxona vakillari, salohiyatli investorlar, ekspertlar va tarmoqqa aloqador boshqa mutaxassislarni jalb qilgan holda Elektrotexnika va elektronika xalqaro savdo ko‘rgazmasini (Uzbek International Electrotechnics & Electronics Fair) tashkil qilish to‘g‘risidagi taklif ma’qullangan.
Avvalroq Toshkent viloyatida elektr va maishiy texnikalarni ishlab chiqarishni yo‘lga qo‘yish rejalashtirilayotgani to‘g‘risida xabar berilgandi.
Izoh (0)