Farg‘ona viloyatida bojxonachilar 300 million so‘mlik uyali aloqa vositalarining noqonuniy aylanmasini fosh etdi, deb xabar berdi “Daryo” muxbiri.
Ma’lum qilinishicha, Farg‘ona viloyati bojxona boshqarmasi Kontrabandaga qarshi kurashish va bojxona auditi bo‘limi xodimlari tomonidan navbatdagi tezkor tadbir o‘tkazilgan.
Tadbir davomida Farg‘ona tumanida harakatlanayotgan fuqaro Yo.D. boshqaruvidagi Captiva oldindan kuzatuvga olingan. Haydovchi kuzatuv ostidaligini sezib qolib avtomashina salonidagi 7 dona qutini yo‘l chetidagi ariq ichiga tashlab yuborgan va harakatlanishda davom etgan. Tadbir ishtirokchilari tomonidan haydovchi to‘xtatilib, ariq ichidagi qutilar belgilangan tartibda ko‘zdan kechirilgan. Mazkur qutilarda qiymati 300 million so‘mlik 6 turdagi 158 dona uyali aloqa vositalari borligi aniqlangan.
Hozirda ushbu holat yuzasidan bojxona organlari tomonidan tergovga qadar tekshiruv harakatlari olib borilmoqda.
Izoh (0)