Jizzax viloyati Do‘stlik tumanida ayollarni fohishalik qilish uchun Turkiyaga yuborayotgan shaxs qo‘lga olindi, deya xabar bermoqda Tergov departamenti.
Qayd etilishicha, 2021-yilning 26-fevral kuni 21 yoshli U.A., 18 yoshli G.B. va 30 yoshli I.B. (barchasi ayol) viloyat IIB boshlig‘i nomiga ariza bilan murojaat qilgan.
Arizada ular A. ismli shaxs ularni Turkiya davlatiga haq evaziga fohishalik bilan shug‘ullanib, bir yilda uy, avtomashina olishlari mumkinligiga qiziqtirganini aytgan.
Qayd etilishicha, A. ismli shaxs ayollarga o‘zining hisobidan aviachiptalarni sotib olib, ularni Islom Karimov nomidagi Toshkent xalqaro aeroporti orqali yuborish maqsadida yo‘lovchi taksida olib ketayotgan vaqtida Do‘stlik tumani “Manas” YHXB maskanida ushlangan.
Tekshiruv davomida uning yonidan ushbu fuqarolarga tegishli xorijga chiqish pasportlari, aviachipta hamda COVID-19 tibbiy ma’lumotnomalari ashyoviy dalil tariqasida rasmiylashtirib olingan.
Olib borilgan tergovga qadar tekshiruv harakatlari davomida ushbu jinoyatni 21 yoshli A.B. sodir etganligi aniqlangan.
Mazkur holat yuzasidan Do‘stlik tumani IIB huzuridagi tergov guruhi tomonidan A.B.ga nisbatan Jinoyat kodeksning 135-moddasi 2-qismi “b” bandi (ikki yoki undan ortiq shaxsni olish-sotish yoxud odamni undan foydalanish maqsadida yollash) bilan jinoyat ishi qo‘zg‘atilib, gumon qilinuvchi tariqasida jalb qilingan.
Hozirda A.B. muqaddam ushbu turdagi jinoyatlarni sodir qilib, fuqarolarni chet elga shahvoniy niyatlarda yuborgan holatlari bor yoki yo‘qligini aniqlash maqsadida tergov harakatlari olib borilmoqda.
Bundan avval Toshkentda intim xizmatlar ko‘rsatuvchi spa-salonlar aniqlangani, poytaxtda liftda voyaga yetmagan qizlarga tegajog‘lik qilgan erkak 1,5 yilga qamalgani hamda Navoiyda boshpanasiz qizga o‘z uyidan joy berib, uni fohishalikka majburlagan ayol ushlangani haqida xabar berilgandi.
Izoh (0)