O‘zbekiston Markaziy banki 2020-yilning IV choragi bo‘yicha Aholining iste’mol kayfiyati sharhini e’lon qildi.
Markaziy bank tomonidan aholining daromadlari va xarajatlari tarkibi, ularning iste’mol va jamg‘arish kayfiyati hamda kreditga bo‘lgan talabi, shuningdek, inflyatsiyaning aholining turli daromadga ega qatlamlariga ta’sirlarini o‘rganish bo‘yicha respublikaning barcha hududlarida so‘rovlar o‘tkazilgan. So‘rovda 2020-yil IV choragida kuzatilgan tendensiyalar bo‘yicha savollarga berilgan javoblarini tahlil qilish orqali aholining fikr-mulohazalari va kutilmalariga baho berilgan.
Respondentlarning 70 foizi 2020-yilda o‘z daromadlarining keskin kamayganini ta’kidlagan bo‘lsa, faqatgina 15 foizi daromadlarining oshganligini ma’lum qilgan. Bunda, o‘tgan davrdagi iqtisodiy holatning yomonlashishi asosan respondentlarning kam daromadli qismiga sezilarli darajada salbiy ta’sir ko‘rsatgan.
65 foiz respondentlar kelgusi 12 oy davomida daromadlari oshishini ma’lum qilgan. Daromadlari o‘zgarishsiz qolishi yoki kamayishini kutayotgan aholi vakillari umumiy respondentlarning 20 foiziga teng bo‘ldi.
37,4 foiz respondentlar jamg‘armasi yo‘qligini ma’lum qilgan bo‘lsa, 23,6 foiz respondent agar daromad olish manbalarida uzilish bo‘lgan taqdirda jamg‘armalar “o‘rtacha 1 oygacha yetadi” deb javob bergan. 21,7 foiz respondentlar esa 1−3 oygacha, 9 foizi 3−6 oygacha yetadi, deb javob bergan.
Markaziy bank sharhiga ko‘ra, o‘tgan 12 oy davomida oilaviy daromadi 3 million so‘mgacha bo‘lgan respondentlar tomonidan “daromadlar keskin kamaydi” va “biroz kamaydi” degan javoblar ulushi boshqa daromadli guruhlarnikidan sezilarli darajada yuqorini tashkil etgan.
Eslatib o‘tamiz, Prezident Shavkat Mirziyoyev 29-dekabr kuni Oliy Majlisga yo‘llagan Murojaatnomasida 2021-yilda narx-navo o‘sishini 10 foizdan oshirmaslik Markaziy bank va hukumatning asosiy vazifasi bo‘lishini aytgandi. Fevral oyida mamlakatda inflyatsiya darajasi 0,6 foizni tashkil etgan.
Izoh (0)