Abu-Dabida o‘tkazilgan Xalqaro mudofaa ko‘rgazmasida (IDEX) Kanadaning Streit Group kompaniyasi Ukrainaning Highland Systems kompaniyasi bilan birgalikda Storm nomli gusenitsali elektromobilini namoyish etdi. Noyob zirhli texnikaning taqdimotini ko‘plab jangari filmlar qahramoni Stiven Sigalning shaxsan o‘zi o‘tkazgan, deb xabar beradi Motor.
Zirhlangan Storm amfibiyasi — asli rossiyalik German Gutorov tomonidan asos solingan Kanadaning Streit Group hamda Ukrainaning Highland Systems firmalari hamkorligida yaratilgan. Aktyorning so‘zlariga ko‘ra, gusenitsali elektromobil dizayni Lamborghini mashinasi va Stealth qiruvchi samolyotini o‘zida uyg‘unlashtirgan. Stiven Sigal agar shu kabi sinfga kiruvchi mashinani xarid qilish imkoni bo‘lganida, aynan Storm’ni sotib olgan bo‘lishini ta’kidlagan.
Storm amfibiyasi umumiy hisobda 2500 ot kuchini taqdim eta oladigan uchta elektromotor va dizel dvigatel bilan jihozlangan. Yo‘ltanlamas gibrid rejimda 18-36 soat, elektromotorda 1,5-3,5 soat harakatlana oladi. Agarda dizel agregatdan generator sifatida foydalanilsa, Storm 8,5 soat yurishga qodir.
Og‘irligi 8 tonnaga teng zirhli transportyor quruqlikda soatiga 140 kilometr, suvda esa 30 km/soat tezlikda harakatlana oladi. Mashina kompozit gusenitsa bilan jihozlangani sabab tuproqdagi bosim har bir santimetr kvadrat uchun 230 grammgacha bo‘ladi. Yo‘ltanlamasni STANAG 4569 darajasi bo‘yicha zirhlash mumkin, bu zirhni teshishga qodir 7,62x39 kalibrli patronlarga va ostida portlagan minalarga bardosh bera olishini anglatadi.
Avvalroq O‘zbekistonda “Qalqon” nomli yengil zirhlangan avtomobil ishlab chiqarilgani to‘g‘risida xabar berilgandi.
Izoh (0)