Видео: Украина компаниясининг зирҳли амфибияси тақдимотини ўтказаётган Голливуд актёри Стивен Сигал

Абу-Дабида ўтказилган Халқаро мудофаа кўргазмасида (IDЕХ) Канаданинг Streit Group компанияси Украинанинг Highland Systemс компанияси билан биргаликда Storm номли гусеницали электромобилини намойиш этди. Ноёб зирҳли техниканинг тақдимотини кўплаб жангари фильмлар қаҳрамони Стивен Сигалнинг шахсан ўзи ўтказган, деб хабар беради Motor.

Зирҳланган Storm амфибияси — асли россиялик Герман Гуторов томонидан асос солинган Канаданинг Streit Group ҳамда Украинанинг Highland Systemс фирмалари ҳамкорлигида яратилган. Актёрнинг сўзларига кўра, гусеницали электромобил дизайни Lamborghini машинаси ва Stealth қирувчи самолётини ўзида уйғунлаштирган. Стивен Сигал агар шу каби синфга кирувчи машинани харид қилиш имкони бўлганида, айнан Storm’ни сотиб олган бўлишини таъкидлаган.

Storm амфибияси умумий ҳисобда 2500 от кучини тақдим эта оладиган учта электромотор ва дизель двигатель билан жиҳозланган. Йўлтанламас гибрид режимда 18-36 соат, электромоторда 1,5-3,5 соат ҳаракатлана олади. Агарда дизель агрегатдан генератор сифатида фойдаланилса, Storm 8,5 соат юришга қодир.

Оғирлиги 8 тоннага тенг зирҳли транспортёр қуруқликда соатига 140 километр, сувда эса 30 км/соат тезликда ҳаракатлана олади. Машина композит гусеница билан жиҳозлангани сабаб тупроқдаги босим ҳар бир сантиметр квадрат учун 230 граммгача бўлади. Йўлтанламасни STENAG 4569 даражаси бўйича зирҳлаш мумкин, бу зирҳни тешишга қодир 7,62х39 калибрли патронларга ва остида портлаган миналарга бардош бера олишини англатади.

Аввалроқ Ўзбекистонда «Қалқон» номли енгил зирҳланган автомобиль ишлаб чиқарилгани тўғрисида хабар берилганди.