Belarusda bo‘lib o‘tgan prezidentlik saylovida o‘z nomzodi bilan qatnashgan Svetlana Tixanovskaya mamlakatda hokimiyat yil oxirigacha o‘zgaradi, deb hisoblaydi. Bu haqda uning Bild jurnaliga bergan intervyusiga tayanib, Meduza xabar berdi.
“Lukashenko rejimi bu yil qulaydi. U bahorda hokimiyatni tark etadi, deb o‘ylayman”, — dedi Tixanovskaya Bild jurnaliga bergan intervyusida.
Uning fikriga ko‘ra, mamlakatning ham ichkarisidan, ham tashqarisidan Lukashenko rejimiga ko‘rsatilayotgan bosim hokimiyatning o‘zgarishiga olib keladi. “Qarshi bo‘lganlarning barchasi turli vositalar bilan harakat qilganida biz ko‘pchilikni tashkil qilamiz. Shuningdek, biz AQSh yangi hokimiyati va Yevropa Ittifoqi o‘rtasida mustahkam ittifoqchilik o‘rnatilishni umid bilan kutmoqdamiz”, — deya qo‘shimcha qildi Tixanovskaya.
Mamlakatda hech narsa o‘zgarmayapti, degan tuyg‘u yolg‘on, deya ta’kidladi u. “So‘nggi olti oy davomida butun mamlakat o‘zgardi, har bir fuqaro o‘zgardi. Hech kim belaruslar ongidan ozodlik va qadr-qimmat g‘oyasini o‘chira olmaydi. Odamlar hech qachon o‘zlari xalos bo‘lgan qullikka qaytmaydi. Endi biz ozodmiz va bu tuyg‘u tobora kuchaymoqda”, — dedi Tixanovskaya.
Fevral oyida Shveysariyaning Le Temps gazetasiga bergan intervyusida Tixanovskaya Belorusdagi norozilik harakati “ko‘chalarni qo‘ldan chiqargani”, ammo bahorda o‘z faoliyatini qayta boshlashi mumkinligini aytgan.
Svetlana Tixanovskaya 2020-yil avgust oyida Belarusda bo‘lib o‘tgan prezidentlik saylovlarida Aleksandr Lukashenkoning asosiy raqibi bo‘lgan. Markaziy saylov komissiyasi Lukashenkoning g‘alabasini e’lon qilgandan so‘ng, mamlakatda ommaviy noroziliklar boshlandi, namoyishlar birinchi kunlari hukumat tomonidan shafqatsizlarcha bostirildi. Saylov natijalarini tan olmagan Tixanovskaya hukumat bosimi ostida chet elga ketishga majbur bo‘ldi.
Izoh (0)