Belarusdagi muxolifat rahbari Svetlana Tixanovskaya OMON va Uyushgan jinoyatchilik va korrupsiyaga qarshi kurashish bosh boshqarmasini terroristik tashkilotlar deb tan olishni talab qilmoqda. Bu haqda u Niderlandiya tashqi ishlar vaziri Stefan Blok bilan uchrashuvda aytib o‘tdi, deb xabar berdi Tixanovskayaning Telegram kanali.

Foto: Telegram / Tixanovskaya

Siyosatchi xavfsizlik kuchlariga qarshi sanksiyalarni joriy etishga chaqirdi.

“Ular jinoiy to‘dalarga aylangani sababli biz ushbu tashkilotlarni ekstremistik yoki terroristik deb tan olish tartibini boshlaymiz”, – dedi Tixanovskaya.

Tixanovskayaning ta’kidlashicha, xalq tomonga o‘tadigan xavfsizlik xodimlari amnistiyaga umid qilishlari mumkin.

Uning so‘zlariga ko‘ra, Belarusda xavfsizlik kuchlarining harakatlari tobora kengayib bormoqda.

“Avvaliga ular ko‘chada odamlarni to‘xtatib qolishdi. Keyin kvartiralarga bostirib kirishni boshladi. Endi ular to‘g‘ridan to‘g‘ri oilalarga bosim o‘tkazib, namoyishchilarning bolalari ijtimoiy xavfli vaziyatda ekanini e’lon qilish bilan qo‘rqitishdi.

Shuning uchun biz Belarus xalqiga qarshi jinoyatlar to‘g‘risidagi dalillarni ro‘yxatga olish tizimini yaratyapmiz. Bu hamma to‘ldirishi mumkin bo‘lgan va rejim sheriklarining sanksiyalar hamda sud jarayonlariga bevosita olib keladigan yagona dalil bazasi bo‘ladi”, – dedi Tixanovskaya.

Eslatib o‘tamiz, Yevropa Ittifoqi allaqachon Belarus rasmiylariga qarshi sanksiyalarning ikkita blokini joriy qilgan edi. “Qora ro‘yxat”ga mamlakat rahbariyatining 55 vakili, jumladan, Aleksandr Lukashenko va xavfsizlik xizmati xodimlari kiritilgan. Ularning Yevropa Ittifoqiga kirishi taqiqlanadi va agar Yevropadagi bank hisob raqamlari aniqlansa, muzlatib qo‘yiladi.

Tixanovskaya, shuningdek, Yevropa Ittifoqidan Belarusga qarshi sanksiyalarni kengaytirishni so‘radi.

Avvalroq Aleksandr Lukashenko Belarusdagi namoyish qatnashchilarini terrorizm yo‘liga o‘tganlikda ayblagandi.