Беларусда бўлиб ўтган президентлик сайловида ўз номзоди билан қатнашган Светлана Тихановская мамлакатда ҳокимият йил охиригача ўзгаради, деб ҳисоблайди. Бу ҳақда унинг Билд журналига берган интервьюсига таяниб, Meduza хабар берди.
«Лукашенко режими бу йил қулайди. У баҳорда ҳокимиятни тарк этади, деб ўйлайман», — деди Тихановская Билд журналига берган интервьюсида.
Унинг фикрига кўра, мамлакатнинг ҳам ичкарисидан, ҳам ташқарисидан Лукашенко режимига кўрсатилаётган босим ҳокимиятнинг ўзгаришига олиб келади. «Қарши бўлганларнинг барчаси турли воситалар билан ҳаракат қилганида биз кўпчиликни ташкил қиламиз. Шунингдек, биз АҚШ янги ҳокимияти ва Европа Иттифоқи ўртасида мустаҳкам иттифоқчилик ўрнатилишни умид билан кутмоқдамиз», — дея қўшимча қилди Тихановская.
Мамлакатда ҳеч нарса ўзгармаяпти, деган туйғу ёлғон, дея таъкидлади у. «Сўнгги олти ой давомида бутун мамлакат ўзгарди, ҳар бир фуқаро ўзгарди. Ҳеч ким беларуслар онгидан озодлик ва қадр-қиммат ғоясини ўчира олмайди. Одамлар ҳеч қачон ўзлари халос бўлган қулликка қайтмайди. Энди биз озодмиз ва бу туйғу тобора кучаймоқда», — деди Тихановская.
Февраль ойида Швейцариянинг Ле Темпс газетасига берган интервьюсида Тихановская Белорусдаги норозилик ҳаракати «кўчаларни қўлдан чиқаргани», аммо баҳорда ўз фаолиятини қайта бошлаши мумкинлигини айтган.
Светлана Тихановская 2020 йил август ойида Беларусда бўлиб ўтган президентлик сайловларида Александр Лукашенконинг асосий рақиби бўлган. Марказий сайлов комиссияси Лукашенконинг ғалабасини эълон қилгандан сўнг, мамлакатда оммавий норозиликлар бошланди, намойишлар биринчи кунлари ҳукумат томонидан шафқатсизларча бостирилди. Сайлов натижаларини тан олмаган Тихановская ҳукумат босими остида чет элга кетишга мажбур бўлди.
Изоҳ (0)