Armanistonda bosh vazirga qarshi namoyishchilar hukumat binosiga bostirib kirdi (video)

Armaniston poytaxti Yerevanda muxolifatchilar guruhi politsiya to‘sig‘ini yorib o‘tib, hukumat majmuasi binolaridan biriga kirdi, deb xabar beradi “Kommersant”. Ular bosh vazir Nikol Pashinyanning iste’fosini talab qildi. Aksiya tashkilotchilari — “Dashnaksutyun” muxolifat partiyasining yoshlar ittifoqi.

“Biz Pashinyanning iste’fosini talab qilamiz. O‘z aksiyamiz bilan biz uchun yopiq eshiklar yo‘qligini va biz har qanday hukumat binosiga kira olishimizni ko‘rsatdik”, — deya “Interfaks” aksiya ishtirokchilaridan birining gapini keltirdi.

“RIA Novosti” xabariga qaraganda, muxolifatchilar birinchi qavatda aksiya o‘tkazgan. Ular vazirliklar xodimlarini Nikol Pashinyan tarafdorlarining mitingida qatnashmaslikka chaqirgan. Aksiya bir necha daqiqa davom etgan.

Faollar soqchilar postigacha borgan, ammo o‘z yo‘llarini davom ettirmagan, ular maqsadlari binoni egallab olish emasligini aytgan.

Nikol Pashinyan bugun, 1-mart kuni Xavfsizlik kengashi majlisini o‘tkazdi. “Bosh vazir Nikol Pashinyan raisligida Xavfsizlik kengashining majlisi bo‘lib o‘tdi. Tashqi va ichki xavfsizlik kun tartibidagi masalalar, muammolar va ularning yechimlari muhokama qilindi”, — deyiladi hukumat xabarida.

1-mart kuni kechqurunga Yerevanda ikkita miting rejalashtirilgan: 18:00 da (Toshkent vaqti bilan 19:00) Bagramyan shohko‘chasida muxolifat yig‘iladi, bosh vazir Nikol Pashinyan tarafdorlari esa 18:30 (19:30)da Respublika maydonida to‘planadi.

23-fevral kuni Armaniston bosh vaziri 1in.am kanaliga bergan intervyusida 2020-yilning kuzida Tog‘li Qorabog‘dagi mojaro paytida Yerevan qo‘llagan “Iskander” raketalari “portlamagan yoki 10 foiz qismigina portlagan”ini aytgan. Yerevan Today nashri jurnalistlari Armaniston Qurolli Kuchlari Bosh shtabi boshlig‘ining birinchi o‘rinbosari Tiran Xachatryandan ushbu bayonotga izoh berishni so‘raganida, u uzoq kulgan va “bo‘lishi mumkin emas” deb javob bergan. Shundan keyin u Nikol Pashinyanning taklifiga binoan ishdan bo‘shatilgan.

Bu voqeadan keyin Armaniston Qurolli Kuchlari Bosh shtabi mamlakat bosh vaziri Nikol Pashinyan va hukumatning zudlik bilan iste’foga chiqishini talab qildi. Bayonotga imzo chekkan 40 nafar yuqori martabali harbiy xizmatchining fikricha, Xachatryan “yuzaki o‘ylangan va asossiz sabablarga ko‘ra” ishdan bo‘shatilgan.

Nikol Pashinyan harbiylarning bayonotiga javoban Facebook orqali mazkur bayonotni “harbiy to‘ntarishga urinish” deb hisoblayotganini ma’lum qildi va o‘z tarafdorlarini namoyishga chiqishga chaqirdi. Pashinyan, shuningdek, harbiylar bayonotiga imzo chekkan Bosh shtab boshlig‘i Onik Gasparyanni ham lavozimidan ozod qilganini aytdi.

Ammo Armaniston prezidenti Armen Sarkisyan bosh vazir Nikol Pashinyanning Qurolli Kuchlar Bosh shtabi boshlig‘i Onik Gasparyanni ishdan bo‘shatish haqidagi taklifini imzolashdan bosh tortdi. Bosh shtab boshlig‘ini ishdan bo‘shatish haqidagi buyruq loyihasini prezident apparati o‘rganib chiqqan hamda huquqshunoslar va ekspertlar bilan batafsil muhokama qilingan. Ular tashabbus “butunlay Konstitutsiyaga zid” degan xulosaga kelgan.

Shundan keyin Nikol Pashinyan prezident Armen Sarkisyanga Bosh shtab boshlig‘ini ishdan bo‘shatish haqidagi arznomani qaytadan yuborganini ma’lum qildi.

2020-yil 10-noyabr kuni Tog‘li Qorabog‘ bo‘yicha bitim imzolangani, unga ko‘ra Armaniston bir qator hududlarni Ozarbayjonga topshirgani haqida xabar berilgan edi. Muxolifat Pashinyandan “xoinlik” shartnomasini imzolagani sababli iste’foga chiqishni talab qildi. Shundan so‘ng bosh vazir iste’foga chiqishga tayyorligini ma’lum qildi. O‘shandan buyon mamlakatda bosh vazirga qarshi namoyishlar davom etib kelmoqda.