Toshkent shahrining Shayxontohur tumanida tadbirkorning 1,9 milliard so‘mini o‘z ehtiyojlari uchun ishlatib yuborgan firibgarga nisbatan jinoyat ishi qo‘zg‘atildi. Bu haqda Bosh prokuraturasi huzuridagi Iqtisodiy jinoyatlarga qarshi kurashish departamenti xabar berdi.
Ma’lum qilinishicha, departamentning Shayxontohur tumani bo‘limi tomonidan tadbirkorlik subyektlarining huquqlarini himoya qilish yuzasidan tergovga qadar tekshiruv o‘tkazilgan. Tekshiruv davomida fuqaro G.A. “D” nomli MChJ rahbarining ishonchiga kirib, 2020-yilning oktabr—dekabr oylarida jamiyatning 2,7 milliard so‘mlik dori vositalarini Toshkent shahri va Namangan viloyatidagi dorixonalarga yetkazib bergan.
Sotuvdan tushgan 1,9 milliard so‘mni esa o‘zining shaxsiy ehtiyojlariga ishlatib yuborib, “D” MChJ manfaatlariga juda ko‘p miqdorda zarar yetkazgani aniqlangan.
Mazkur holat yuzasidan G.A.ga nisbatan Jinoyat kodeksining 168-moddasi (firibgarlik) 4-qismi bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Samarqandda ayolini 35 ming dollarga chuv tushirib ketgan erkakka nisbatan jinoiy ish ochilgani, Sardoba suv ombori toshqinidan foyda ko‘rmoqchi bo‘lgan firibgar 3,5 yilga qamalgani hamda Samarqandda pullarini ko‘paytirib berishini aytib, fuqarolardan 22 250 dollargacha pul olib, qaytarib bermagan kompaniya aniqlangani haqida xabar berilgandi.
Izoh (0)