Тошкент шаҳрининг Шайхонтоҳур туманида тадбиркорнинг 1,9 миллиард сўмини ўз эҳтиёжлари учун ишлатиб юборган фирибгарга нисбатан жиноят иши қўзғатилди. Бу ҳақда Бош прокуратураси ҳузуридаги Иқтисодий жиноятларга қарши курашиш департаменти хабар берди.
Маълум қилинишича, департаментнинг Шайхонтоҳур тумани бўлими томонидан тадбиркорлик субъектларининг ҳуқуқларини ҳимоя қилиш юзасидан терговга қадар текширув ўтказилган. Текширув давомида фуқаро Г.А. «Д» номли МЧЖ раҳбарининг ишончига кириб, 2020 йилнинг октябрь—декабрь ойларида жамиятнинг 2,7 миллиард сўмлик дори воситаларини Тошкент шаҳри ва Наманган вилоятидаги дорихоналарга етказиб берган.
Сотувдан тушган 1,9 миллиард сўмни эса ўзининг шахсий эҳтиёжларига ишлатиб юбориб, «Д» МЧЖ манфаатларига жуда кўп миқдорда зарар етказгани аниқланган.
Мазкур ҳолат юзасидан Г.А.га нисбатан Жиноят кодексининг 168-моддаси (фирибгарлик) 4-қисми билан жиноят иши қўзғатилиб, тергов ҳаракатлари ўтказилмоқда.
Аввалроқ Самарқандда аёлини 35 минг долларга чув тушириб кетган эркакка нисбатан жиноий иш очилгани, Сардоба сув омбори тошқинидан фойда кўрмоқчи бўлган фирибгар 3,5 йилга қамалгани ҳамда Самарқандда пулларини кўпайтириб беришини айтиб, фуқаролардан 22 250 долларгача пул олиб, қайтариб бермаган компания аниқлангани ҳақида хабар берилганди.
Изоҳ (0)