27-fevral soat 03:51 da Toshkentning Chilonzor tumanida joylashgan kafeda yong‘in sodir bo‘layotgani haqida poytaxt Favqulodda vaziyatlar boshqarmasi yong‘in-qutqaruv xizmatiga xabar kelib tushgan, deb xabar beradi FVV matbuot xizmati.
Ta’kidlanishicha, yong‘in tumanning “Sharq” MFYdagi Guliston ko‘chasi 9-A uy manzilida joylashgan “Shovotlandiya-1” MChJ kafesida sodir bo‘lgan.
Voqea joyiga 4 ta yong‘in o‘chirish bo‘linmasi jalb etilib, birinchi bo‘linma chaqiruv manziliga soat 03:54 da yetib borgan. Soat 04:11 da yong‘in qurshab olinib, soat 04:37 da to‘liq bartaraf etilgan.
“Yong‘in oqibatida kafening tom qismi hamda ichki jihozlari, 150 kvadrat metr maydoni yonib jiddiy zararlangan. Achinarlisi yong‘in oqibatida jabrlanganlar mavjud”, — deyiladi xabarda.
Voqea joyiga Toshkent shahar FVB, IIBB rahbariyati, prokuratura, Sog‘liqni saqlash va kommunal xizmatlar mutaxassislari, IIB tezkor-tergov guruhi hamda tegishli xizmatlarning kuch va vositalari jalb etilgan. Mazkur holat yuzasidan dastlabki tergovoldi surishtiruv ishlari olib borilmoqda. Voqea yuzasidan vakolatli organlar tomonidan qo‘shimcha ma’lumot beriladi.
Avvalroq Marg‘ilondagi Mustaqillik ko‘chasida joylashgan to‘rtta do‘konda yong‘in yuz bergani, Jizzax shahridagi plastmassa quvurlar ishlab chiqaruvchi korxonada yong‘in sodir bo‘lgani to‘g‘risida xabar berilgandi.
Izoh (0)