O‘zbekiston tashqi ishlar vaziri Abdulaziz Komilov 25-fevral, payshanba kuni diplomatik missiyasini yakunlayotgan Turkiyaning favqulodda va muxtor elchisi Mehmet Sureyya Erni qabul qildi, deya xabar qilmoqda vazirlik matbuot xizmati.
Uchrashuvda O‘zbekiston—Turkiya kun tartibining dolzarb masalalari muhokama qilindi.
Oliy darajadagi aloqalar, jumladan, 2020-yilda Anqara shahrida ikki mamlakat davlat rahbarlari raisligida bo‘lib o‘tgan O‘zbekiston—Turkiya strategik hamkorlik kengashining birinchi yig‘ilishi doirasida erishilgan kelishuvlarni amalga oshirish jarayoni muhokama qilindi.
Shuningdek, turli darajalarda bo‘lib o‘tadigan ikki tomonlama tadbirlar jadvali va kun tartibi yuzasidan fikr almashildi.
Vazir elchining O‘zbekistondagi faoliyati samarali bo‘lganini qayd etdi va unga davlatlararo munosabatlarni mustahkamlashga qo‘shgan ulkan hissasi uchun minnatdorlik bildirdi.
Mehmet Sureyya Er, o‘z navbatida, Turkiya elchisi sifatidagi faoliyati davomida ko‘rsatilgan yordam va qo‘llab-quvvatlash uchun minnatdorchilik bildirdi.
Bundan avval Abdulaziz Komilov Afg‘oniston prezidenti qabulida bo‘lib, unga Shavkat Mirziyoyevning maktubini topshirgani, Tojikiston prezidenti Emomali Rahmon, Qozog‘iston prezidenti Qosim-Jomart To‘qayev hamda Turkmaniston prezidenti Gurbanguli Berdimuhamedov bilan uchrashgani haqida xabar berilgandi.
Izoh (0)