26-fevral kuni AOKAda Mudofaa vazirligi mutasaddilari ishtirokida o‘tkazilgan matbuot anjumanida muddatli harbiy xizmatga ketuvchilar koronavirusga qarshi emlanish-emlanmasligiga aniqlik kiritildi.
“Hozirgacha faqat muddatli harbiy xizmatga ketuvchilarda koronavirusni aniqlash uchun test sinovidan o‘tkazish, tekshirish amalga oshiriladi. Ularni vaksinalar bilan emlash hali yo‘lga qo‘yilgani yo‘q”, — deb javob bergan o‘smirlar va chaqiriluvchi yoshlarga tibbiy yordamni tashkil etish markazi vakili.
Uning aytishicha, agar muddatli harbiy xizmatga ketuvchilar tekshiruvdan o‘tkazilganda ularda test natijalari manfiy bo‘lsa, harbiy xizmatga qo‘yiladi. Ammo vaksina bilan emlanmaydi.
Eslatib o‘tamiz, O‘zbekistonda koronavirusga qarshi emlash mart oyining birinchi yarmida boshlanishi ma’lum qilingan. Birinchi navbatda kasallik yuqish xavfi yuqori bo‘lgan kishilar: 65 yoshdan kattalar, tibbiyot xodimlari, surunkali kasalliklar bilan dispanser nazoratida turadiganlar, Qurolli kuchlar va huquqni muhofaza qilish organlari xodimlari, jurnalistlar, blogerlar, OAV xodimlari, transport xodimlari (metro, temiryo‘l, aeroport), maktabgacha ta’lim tashkilotlari va maktablarda xizmat qilayotgan xodimlar, chet davlatlarda tahsil oluvchi talabalar va mehnat migrantlari emlanadi.
Ijtimoiy himoyaga muhtoj, yoshi katta va aholining boshqa zaif qatlamlari vakillarini emlash bepul amalga oshiriladi.
Maxsus komissiya qaroriga ko‘ra, O‘zbekistonda Rossiyaning Gamaleya ilmiy-tadqiqot markazi tomonidan ishlab chiqilgan “Sputnik V” vaksinasini qo‘llashga ruxsat berildi. Koronavirusga qarshi kurashish tadbirlari va vaksina uchun 3 trillion so‘m ajratish rejalashtirilgan.
Izoh (0)