Oliy Majlis Senati raisi Tanzila Norboyeva “Amerika ovozi”ga bergan intervyusida hozirda O‘zbekiston parlamenti butunlay mustaqil organ ekanligini ma’lum qildi, deb yozmoqda “Gazeta.uz”
U parlament Prezidentga tobe degan tushunchaga qo‘shilmasligini aytgan.
“Parlament Prezidentga bo‘ysunadi degan gaplar o‘tmishga, avvalgi dunyoqarashga tegishli. Albatta, parlament Prezident aytgan muammolarni ko‘rib chiqqan. Hatto qabul qilinadigan qarorlar muvofiqlashtirilgan. Ammo hozir unday emas. Hozir kun tartibini o‘zimiz shakllantiramiz. Ilgari parlamentga energiya tizimi yoki Sardobani o‘rganishga kim yo‘l bergan? Biz o‘rganib chiqdik, muhokama qilish uchun voqea joyiga bordik, javobgarlarni so‘roq qilish uchun chaqirdik, ko‘rsatmalar berdik. Bu parlament mustaqilligining natijasi emasmi?”, — degan Senat raisi.
Parlament yuqori palatasi raisining ta’kidlashicha, Senat o‘z ishini “kimgadir yoqish uchun” moslashtirmaydi.
“Prezident aytganidek, eng muhimi odamlarni rozi qilish. Biz esa xalq vakilimiz… Bu Prezidentga yoqadi, chunki biz Prezidentning siyosatini bilamiz. Prezident siyosati — odamlarni rozi qilish”, — degan u.
Tanzila Norboyevaning aytishicha, hozirda hech kim parlamentga bosim o‘tkazmaydi.
“Hozir biz butunlay mustaqilmiz. Hech kim bizga bosim o‘tkazmaydi. Hech kim ‘men aytganimdek qilasan, u masalani ko‘rib chiq yoki ko‘rib chiqma’ demaydi. Bunday so‘zlar hozir kun tartibidan chiqqan”, — deb ta’kidlagan parlament yuqori palatasi rahbari.
Uning so‘zlariga ko‘ra, Senat Prezident administratsiyasi tomonidan ko‘rib chiqilgan yoki 150 nafar deputat tomonidan qabul qilingan qonunni tasdiqlamasligi mumkin — agar hujjat inson huquqlari talablariga javob bermasa, O‘zbekiston reytingiga salbiy ta’sir ko‘rsatsa yoki alohida idora manfaatlarni ifoda etsa. Masalan, 2020-yilda yuqori palata oltita qonunni rad etdi.
Avvalroq Prezident Shavkat Mirziyoyev O‘zbekiston mamlakatning ijtimoiy-iqtisodiy hayotiga oid deyarli barcha masalalarni prezident hujjatlari yordamida tartibga solishi shart ekanligini aytgandi. Davlat rahbari deputatlar tashabbusi bilan ilgari surilgan qonunlar barmoq bilan sanoqli ekanini aytgan. Prezident deputatlar yetarlicha tashabbus ko‘rsatmayotganini 2017-yilda ham tanqid qilgan.
Izoh (0)