Toshkent viloyatining Piskent tumanida “Yoshlar — kelajagimiz” davlat dasturi doirasida ajratilgan kredit mablag‘ini talon-toroj qilingan fermer xo‘jaligi rahbari va boshqalarga nisbatan jinoyat ishi qo‘zg‘atildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti matbuot xizmati xabar berdi.
Departamentning Piskent tuman bo‘limi tomonidan o‘tkazilgan tergovga qadar tekshiruvda aniqlanishicha, “T” fermer xo‘jaligi rahbari T.D. va akasi T.I. “Yoshlar — kelajagimiz” davlat dasturi doirasida imtiyozli kredit olish maqsadida “M” MChJni tashkil etgan. Fermer xo‘jaligi va ushbu jamiyat o‘rtasida naslli qo‘ylarni xarid qilish bo‘yicha shartnoma tuzib, 1,3 milliard so‘m kredit mablag‘ini fermer xo‘jaligiga o‘tkazish orqali naqdlashtirib, budjetdan ajratilgan juda ko‘p miqdordagi imtiyozli kredit mablag‘ini o‘zlashtirgan.
Holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 3-qismi, 207-moddasi (mansabga sovuqqonlik bilan qarash) 1-qismi bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq “Yoshlar — kelajagimiz” jamg‘armasining katta miqdordagi mablag‘ini talon-toroj qilgan bosh hisobchi ishdan olingani, Toshkentda bankomatlarga joylashtirish uchun ajratilgan 2,3 milliard so‘mni o‘zlashtirgan bank xodimlari ushlangani, Samarqanddagi korxona mansabdor shaxslari salkam 12,5 milliard so‘mni talon-toroj qilgani ma’lum bo‘lgani, Namanganda 25 nafar fuqaroga ajratilgan 669,4 million so‘mni tadbirkor va bank xodimlari talon-toroj qilgani aniqlangani haqida xabarlar berilgandi.
Izoh (0)