Бугунги кунда Ўзбекистон аҳолисининг қарийб ярмини, яъни 17 миллионга яқинини хотин-қизлар ташкил этмоқда. Бу ҳақда айни пайтда Президент Шавкат Мирзиёев раислигида хотин-қизларнинг муаммоларини ҳал қилиш ва уларни қўллаб-қувватлаш масаласига бағишлаб ўтказилаётган видеоселектор йиғилишида таъкидланди, дея хабар бермоқда «Дарё» мухбири.
Йиғилишда таъкидланишича, ўтган икки йилда 116 мингга яқин аёллар ўз тадбиркорлик фаолиятини тўхтатган.
«Бир нарсани аниқ тушуниб олиш лозим. Оиладаги қарийб ҳамма юмушлар, фарзандга таълим-тарбия беришдан бошлаб уйларимизни саришта қилишгача бўлган, барча юмушлар улар зиммасида. Оила ташвишларидан ортиб, эркаклар билан тенгма-тенг ишлаётган, ўзининг ташаббусларини, орзу-умидларини рўёбга чиқариш учун, туну-кун меҳнат қилаётган ва барчага ўрнак бўлаётган хотин-қизларимиз жойларда жуда кўплаб топилади.
Лекин, барча аёлларга ҳам жамиятда ўрнини топиши учун муносиб шароит, имконият яратиб бера оляпмизми? Уларнинг барча муаммолари ҳал бўляптими? Афсуски, йўқ», – деди Президент.
Давлат раҳбари шу каби муаммоларни яна-да чуқур ўрганиш ва бартараф этиш бўйича Республика Хотин-қизлар жамоатчилик кенгаши раиси Танзила Норбоевага топшириқ берди.
«Норбоева Кенгаш фаолиятини самарали йўлга қўйиб, ‘аёллар дафтари’ билан манзилли ишлаш, хотин-қизларни ижтимоий-сиёсий фаоллигини ошириш, тадбиркорлигини қўллаб-қувватлаш, таълим ва касбий кўникмалар олишлари, муносиб иш топишларига ҳар томонлама кўмаклашиш, саломатлигини сақлаш, уй-жой масалаларини ҳал этиш борасида тизимли чора-тадбирларни амалга ошириши ҳамда масъул идоралар фаолиятини мувофиқлаштириб бориши зарур.
Норбоева ва Рафиқов (Касаба уюшмалари федерацияси раиси) ҳар бир вилоятда юриб, хотин-қизлар масалалари билан танишади ва бугунги вазифалар ижросини бевосита ташкил қилади. Шунингдек, Норбоева вилоят ҳокимлари билан бирга, ҳар ойда бир марта туман ҳокимлари, сектор ҳамда мутасадди идора раҳбарларининг хотин-қизлар муаммоларини ҳал этиш юзасидан кўрилаётган чоралар тўғрисидаги ҳисоботларини халқ депутатлари Кенгашларида эшитишни йўлга қўяди», – деди Шавкат Мирзиёев.
Бундан аввал Шавкат Мирзиёев раислигида қишлоқ ва сув хўжалиги соҳасида амалга ошириладиган вазифалар юзасидан видеоселектор ўтказилгани, Шавкат Мирзиёев Тошкент шаҳар ҳокимлигига тирбандликлар юзага келаётган кўчаларда қўшимча ҳаракат йўналишларини очиш бўйича топшириқ бергани ҳамда Туркманистон президенти Шавкат Мирзиёевга мактуб йўллагани ҳақида хабар берилганди.
Изоҳ (0)