Buxoro shahrida 1988-yilning 5-oktabrda sodir etilgan qotillik jinoyati 32 yil deganda barmoq izi yordamida fosh etildi. Bu haqda Buxoro viloyati prokuraturasiga tayanib, “Xalq so‘zi online” xabar berdi.
Qayd etilishicha, 1962-yilda tug‘ilgan fuqaro M.B. Muslima ismli ayolning taklifi bilan uning uyiga kelgan. Yigit onasi tengi ayolga jinsiy yaqinlikni taklif etgan. Ayol buni rad etadi va o‘rtada janjal kelib chiqqan. Janjal vaqtida M.B. yonida bo‘lgan oshxona pichog‘i bilan ayolning qorin va ko‘krak qismiga bir necha marta urib, o‘ldirgan.
Qotillik sodir etish bilan birga, M.B. ayolning uyidan bir nechta tilla taqinchoqlarni o‘g‘irlab ketgan. Jinoyat joyida esa uning barmoq izlari qolgan.
Buxoro viloyat IIB Ekspert-kiriminalistika bo‘limi tomonidan 2020-yilning sentabr oyida avtomatlashtirilgan daktiloskopik identifikatsion tizim orqali barmoq izlari tekshirilgan. Bu kriminalistik o‘rganishlar barmoq izlari fuqaro M.B.ga tegishli ekanligini ko‘rsatgan.
Buxoro shahar prokuraturasi tomonidan ushbu jinoyat ishi bo‘yicha tergov harakatlari qayta tiklangan.
Aniqlanishicha, M.B. 1993-yilda eski tahrirdagi Jinoyat kodeksining 15—81-moddasi (qasddan og‘ir tan jarohati yetkazish), 1996-yilda Jinoyat kodeksining 169-moddasi 2-qismi (o‘g‘rilik), 2005-yilda 169-moddaning 1-qismi (o‘g‘rilik) bilan ayblangan.
Jinoyat ishlari bo‘yicha Olot tuman sudining 2021-yil 15-fevraldagi hukmi bilan sudlanuvchi M.B.ning sodir qilgan jinoyati Jinoyat kodeksining 97-moddasi (qasddan odam o‘ldirish) 2-qismi “i” bandidan Jinoyat kodeksining 97-moddasi 1-qismi hamda 169-moddasi 1-qismiga qayta kvalifikatsiya qilingan, ammo javobgarlikka tortish muddati 25 yil o‘tib ketganligi sabab, u jazodan ozod qilingan.
Izoh (0)