“Shaxsga doir ma’lumotlar to‘g‘risida”gi qonunga qo‘shimchalar kiritilib, O‘zbekiston fuqarolarining shaxsiy ma’lumotlarini mamlakatda saqlash majburiy etib belgilangani haqida xabar berilgan edi. O‘zgartirishlar aprel o‘rtalaridan boshlab kuchga kiradi.
Spot’ning yozishicha, kuni kecha O‘zbekiston Axborotlashtirish va telekommunikatsiyalar sohasida nazorat bo‘yicha davlat inspeksiyasi (“O‘zkomnazorat”) buning aniq tartibini tasdiqlovchi hukumat qarori loyihasini jamoatchilik muhokamasi uchun taqdim etdi.
Unga ko‘ra, Ommaviy kommunikatsiyalar masalalari bo‘yicha markaz va Davlat personallashtirish markazi internetda doimiy ravishda monitoring qiladi. Agar u yoki bu sayt shaxsga doir ma’lumotlarni saqlash va unga ishlov berish qoidalarini buzgani aniqlansa, bu haqda xulosa tuzilib, “O‘zkomnazorat”ga yuboriladi.
Inspeksiya taqdim etilgan xulosa asosida aniqlangan kamchiliklarni bartaraf etish yuzasidan qonunbuzarga (u operator yoki shaxsga doir ma’lumotlar bazasi mulkdori bo‘lishi mumkin) aniq muddat belgilagan holda tegishli taqdimnoma yoki ko‘rsatma beradi. U taqdimnomada yoki ko‘rsatmada keltirilgan kamchiliklarni bartaraf etish chorasini ko‘rishi va bu haqda “O‘zkomnazorat”ni xabardor qilishi lozim.
Taqdimnoma yoki ko‘rsatma talablari bajarilmagan taqdirda, inspeksiya taqdimnomadagi muddatdan so‘ng uch kun ichida sudga tegishli hujjatlar to‘plamini yuboradi. Sud qarori asosida qonunbuzar maxsus reyestrga kiritiladi. Axborot texnologiyalari vazirligi 12 soat ichida sayt faoliyatini cheklaydi.
Saytga kirish tiklanishi mumkin — buning uchun operator yoki uning egasi qonunbuzarlikni bartaraf etishi, bu haqda inspeksiyani xabardor qilishi lozim.
Inspeksiya kamchiliklar bartaraf etilganligi yuzasidan bildirgan yozma (elektron) murojaatini o‘rganib, Ommaviy kommunikatsiyalar masalalari bo‘yicha markazga taqdim etadi. U esa bu haqda Davlat personallashtirish markaziga ma’lum qiladi. Shu asosda Davlat personallashtirish markazi xulosa beradi, shundan so‘ng qonunbuzar reyestrdan chiqariladi.
Izoh (0)