Chinozda noqonuniy qurilishdagi avariya oqibatida uch kishi halok bo‘lgan. Bu haqda to‘rt yil o‘tib — Jizzaxdagi olti qavatli bino qulagach ma’lum qilindi

O‘zbekiston qurilish vaziri Botir Zokirov Jizzax shahridagi qurilishi yakunlanmagan olti qavatli binoning qulashi munosabati bilan 14-yanvar kuni o‘tkazilgan matbuot anjumanida “ikki yil avval Toshkent viloyatida yuz bergan shunga o‘xshash falokat natijasida uch kishi halok bo‘lgan”ini ma’lum qilgan edi. Qurilish vazirligi “Daryo” so‘roviga asosan vazir ta’kidlagan hodisa haqida ma’lumot berdi.

Ma’lum bo‘lishicha, 2017-yili Chinoz shahridagi ikki qavatli umumiy ovqatlanish binosining orqa tomonidan o‘zboshimchalik bilan, loyiha hujjatlari ishlab chiqilmay, noqonuniy ravishda qo‘shimcha bino qurilgan. Qurilish vazirligining izohida qayd etilishicha, “mavjud binoning ‘0’ (nol) otmetkadan pastki qismida yerto‘la qazilgan, bunda stakansimon kolonna poydevori o‘zboshimchalik bilan olib tashlangan”.

Bundan tashqari, binoning 2-qavatidan yuqori qismida ochiq maydon sifatida foydalanish maqsadida tom qismi olib tashlanib, temirbeton plitalar ustiga 3 ming dona kichik beton bloklar olib chiqilgan. Hisobiy yuklar ortgani, konstruksiyalarda zo‘riqish bo‘lgani sabab binoning temirbeton plitalari qulab, avariya sodir bo‘lgan. Uch kishining o‘limiga sabab bo‘lgan falokatdan so‘ng bino uning egasi hisobidan buzib tashlangan.

Hodisaning boshqa tafsilotlari ma’lum qilinmagan.

Eslatib o‘tamiz, 10-yanvar kuni Jizzax shahrida qurilish yakunlanmagan olti qavatli binoning bir qismi qulab tushgan edi. Hodisa oqibatida uning yonidagi inshoot ham zarar ko‘rgan, hech kim tan jarohati olmagan. Ushbu hodisadan so‘ng jinoyat ishi qo‘zg‘atilgan, hukumat komissiyasi tuzilgan, keyinroq binoning qolgan qismi ham buzib tashlangan. Ushbu voqeaga munosabat bildirarkan, prezident Shavkat Mirziyoyev “Jizzax viloyatining qurilish bo‘yicha o‘rinbosari bizning siyosatimizga xiyonat qilgan”ini, “uning butun to‘dasiga qonuniy jazo ko‘rish kerak”ligini ta’kidlagan edi. Keyinroq Jizzax viloyati hokimi o‘rinbosari Akram Rahmonqulov ishdan olingani, unga nisbatan jinoyat ishi qo‘zg‘atilgani ma’lum bo‘ldi.

Avvalroq, 2019 yil avgustida Toshkentdagi Riviera savdo majmuasining qurilishida yuz bergan avariya oqibatida to‘rt kishi halok bo‘lgani, oktabrida Tashkent City’dagi obyektlardan birining qurilishida qatnashayotgan ishchi sakkizinchi qavatdan qulab qurbon bo‘lgani, dekabr oyida Yunusobod metro yo‘lining yangi stansiyalarini qurish vaqtida yuz bergan fojia oqibatida olti kishi vafot etgani haqida xabar berilgan edi. Shuningdek, Qibrayda beton zavodining devori qulashi oqibatida uch kishi, Qarshi shahrida qurilishi bitmagan binodagi temir-beton konstruksiyalari qulashi oqibatida bir kishi, Dehqonoboddagi qurilayotgan do‘konning beton plitalari qulashi oqibatida bir kishi halok bo‘lgan edi.