Daniyada 1-martdan boshlab maydoni 5 ming kvartar metrdan kam bo‘lgan do‘konlar va mamlakatning ayrim hududlaridagi maktablar faoliyatini boshlaydi. Bu haqda “Interfaks” xabar qildi.
Mart oyidan ta’limni an’anaviy shaklda davom ettiradigan o‘quvchilar haftada kamida ikki marta koronavirusni aniqlash bo‘yicha test topshirishi lozim. Ko‘chalarda 25 kishidan iborat guruhlarning to‘planishiga ruxsat berilgan. Daniya hukumati cheklovlar yumshatilganidan keyin kasallanishlar soni ko‘payishi mumkinligini inkor etmagan, biroq ushbu tavakkalga qo‘l urishning vaqti kelganini qayd etgan.
Mamlakatda pandemiya boshlanganidan beri 209 mingdan ziyod COVID-19 bilan kasallanish holati qayd qilingan, kasallik oqibatida vafot etgan bemorlar soni 2,3 ming nafardan ko‘p. Shuningdek, so‘nggi vaqtlarda Daniyadagi kasallanish holatlarining yarmidan ko‘pi yil boshida Yevropada tarqalgan koronavirus shtammi bilan bog‘liqligi aytilmoqda.
Avval koronavirusning “britancha” shtammi aniqlangan mamlakatlar soni 100 dan oshgani, Gretsiyada COVID-19’ga qarshi emlanganlarda jiddiy asoratlar kuzatilgani, Norvegiyada koronavirusning В.1.525 nomli yangi shtammi aniqlangani haqida xabarlar berilgan.
Izoh (0)