Suzuki Motor Corporation direktorlar kengashining 91 yoshli raisi Osamu Suzuki iyun oyida bo‘lib o‘tadigan direktorlar kengashining umumiy yig‘ilishidan keyin lavozimini tark etadi. Bu haqda kompaniya press-reliziga tayanib Kyodo agentligi xabar tarqatdi.
Osamu Suzukining 43 yillik rahbarlik davrida kompaniya avtomobil ishlab chiqaruvchilar dunyo bozorida global darajadagi ishtirokchiga aylangan. Kompaniya rahbariyatidagi o‘zgarishlardan keyin 91 yoshli biznesmen katta maslahatchi lavozimini egallaydi.
Osamu Suzukining o‘g‘li Tosixiro Suzuki 2015-yildan buyon guruh prezidenti lavozimini egallab kelayotgandi va u otasidan keyin kompaniyani boshqaradi.
Osamu Suzuki Suzuki Motor Corporation tizimiga 1958-yilda kelgan va u yerda turli lavozimlarda ishlagan, jumladan, eng quyi bo‘g‘indan eng yuqori o‘ringacha ko‘tarilgan. U Suzuki Motor Corporation asoschisi Michio Suzukining nevarasi Shoko Suzukiga uylanganidan keyin rafiqasining familiyasini olgan. Bunga Suzukilar oilasida erkak merosxo‘rning yo‘qligi sabab bo‘lgan. Osamu Suzuki familiyasini olguniga qadar uning sharifi Matsuda bo‘lgan.
1963-yilda u direktorlik lavozimiga ko‘tariladi. Oradan to‘rt yil o‘tgach, kichik boshqaruvchi direktor, 1972-yilda katta boshqaruvchi direktorlik kursisiga chiqadi. 1978-yilda Osamu prezidentlik lavozimiga ko‘tarildi va korporatsiyaning bosh ijrochi direktoriga aylandi. 2000-yilda u bosh direktorlikni tashlab, Suzuki Motor Corporation’ning direktorlar kengashiga rahbarlik qilishni boshlagan.
Avval Osamu Suzuki kompaniyaning 100 yillik yubileyi munosabati bilan direktorlar kengashi raisligidan ketishini e’lon qilgandi. U o‘zidan keyingi avlodga imkoniyat berib, kompaniyaning o‘rta tezlikdagi biznes-rejasini amalga oshirish lozimligini ta’kidlagan.
Rejaga ko‘ra, kompaniya 2025-moliya yilida sotuvlar hajmini 4,8 trillion iyenaga yetkazishi va 2019-moliya yilidagi 3,49 trillion iyena ko‘rsatkichidan o‘zib ketishi kerak. Shuningdek, kompaniya 2025-yilda avtomobillarni elektrlashtirish jarayonini ham jadallashtirishni ko‘zda tutgan.
Izoh (0)