Chexiyada qariyb ikki oy ichida ilk marotaba koronavirusga chalinish holatining kunlik o‘sishi 15 000 dan oshdi, deb yozmoqda “Korrespondent.net”.
10,7 million aholi istiqomat qiladigan mazkur mamlakatda 23-fevral, o‘tgan bir kecha-kunduzda infeksiya yuqtirish bo‘yicha 15 672 ta yangi holat tasdiqlandi. Oxirgi marta bunday yuqori ko‘rsatkich 6-yanvar kuni qayd etilgan. Yanvar oyining o‘rtalaridan fevral oyining ikkinchi yarmiga qadar kasallanishning kunlik o‘sishi 10 mingdan kam bo‘lgan.
Mintaqaviy jihatdan eng og‘ir vaziyat mamlakatning butun janubiy qismida kuzatilmoqda. 23-fevralda aniqlangan yangi holatlarning aksariyati — 2500 dan ortig‘i Bogemiyaning markaziy qismida, deyarli 2000 ta holat esa Pragada qayd etildi.
Shu bilan birga, ayni paytda kasallikni boshdan o‘tkazayotgan bemorlar soni kuzgi to‘lqinning eng yuqori cho‘qqisidagi bemorlar soniga qaraganda ko‘proq — 127 000 dan ortiq, shundan 6800 ga yaqini kasalxonaga yotqizilgan. Ahvoli og‘ir bemorlar soni 1389 nafarga yetgan, bu butun epidemiya davridan beri kuzatilgan eng yuqori ko‘rsatkichdir.
Sog‘liqni saqlash vazirining o‘rinbosari Vladimir Chernining ta’kidlashicha, koronavirusga chalingan bemorlar uchun reanimatsiya bo‘limlarida atigi 15 foiz bepul joy qolgan. Mamlakatning Maxsus inqiroz markazi Germaniya kasalxonalaridan yordam so‘rash imkoniyatini ko‘rib chiqmoqda.
Eslatib o‘tamiz, chexiyaliklar uchun 25-fevraldan boshlab odam gavjum joylarda respirator, nanoniqob yoki birdaniga ikkita tibbiy niqob taqish majburiyati joriy etiladi.
Chexiya sog‘liqni saqlash vaziri Yan Blatniga ko‘ra, bu tartib koronavirusning “britancha” shtammi keng tarqalishi bilan bog‘liq. Yangi talab, xususan, do‘konlar, kasalxonalar, jamoat transporti va bekatlarga nisbatan qo‘llaniladi.
Avvalroq Chexiya hukumati koronavirus pandemiyasi oldida ojiz qolayotganini tan olgan edi — mamlakatdagi taqiqlar amalda bekor bo‘lgan, aholi ularga bo‘ysunishni istamayapti.
Izoh (0)