Italiyaning Turin shahrida Politecnico di Torino (Turin politexnika universiteti) magistr talaba yoshlari tomonidan O‘zbekiston yoshlari assotsiatsiyasi tashkil etildi, deb xabar bermoqda “Xabar.uz”.
Assotsiatsiyaning asosiy maqsadi O‘zbekistondagi yoshlarni Italiya universitetlari bilan yaqindan tanishtirish, ularga talabalikkacha bo‘lgan davrda ko‘maklashishdan iborat. Xususan, universitetga topshirish uchun kerak bo‘ladigan hujjatlar, universitet tomonidan qo‘yilgan talablar, OTM va Italiya hukumati ta’sis etgan grantlar (scholarship) to‘g‘risida ma’lumot, Visa olish tartibi va boshqa hujjatlarga oid savollarga javob topishda ko‘maklashadi.
Bundan tashqari, assotsiatsiya Italiyadagi o‘zbekistonliklarni ham qo‘llab-quvvatlaydi. Ularni bu mamlakatda sodir bo‘layotgan o‘zgarishlar, cheklovlar, imtiyozlar haqida xabardor qilib borish bilan birga, talabalar orasida turli tadbirlar tashkillashtirishni maqsad qilgan.
Assotsiatsiya vakillarining maqsadi turli qiyinchiliklarga duch kelayotgan bilimli yoshlarga ko‘maklashishdan iborat bo‘lgani sababli bepul xizmat ko‘rsatiladi.
Izoh (0)