Toshkentdagi Tibbiyot xodimlarining kasbiy malakasini rivojlantirish markazining ko‘p tarmoqli klinikasida ishlovchi hamshiraga kompensatsiya to‘lanishida soliq to‘lovlari uchun asossiz ushlab qolingan salkam 12 million so‘m undirib berildi. Bu haqda prokuratura boshqarmasiga tayanib, “Xabar.uz” xabar berdi.
Aniqlanishicha, fuqaro D.Yuldasheva Tibbiyot xodimlarining kasbiy malakasini rivojlantirish markazining ko‘p tarmoqli klinikasida hamshira sifatida ishlab, shu shifoxonada 2020-yilning 8-iyulidan boshlab koronavirus infeksiyasi bilan kasallangan bemorlarni davolash ishlariga jalb etilgan.
D.Yuldasheva bo‘limda 2020-yilning 24-iyunidan 24-iyuliga qadar katta hamshira lavozimida faoliyat olib borgan. 20-iyul kuni olingan tahlil natijasiga ko‘ra, unda koronavirusning manfiy natijasi aniqlangan.
O‘zbekiston Prezidentining 2020-yil 26-martdagi “Koronavirus infeksiyasi tarqalishiga qarshi kurashishga jalb qilingan tibbiyot va sanitariyaepidemiologiya xizmati xodimlarini qo‘llab-quvvatlashga oid qo‘shimcha chora-tadbirlar to‘g‘risida”gi qarorining ilovasida koronavirus infeksiyasi tarqalishiga qarshi kurashish doirasida bemorlar bilan ishlagan vaqtida koronavirus infeksiyasini yuqtirib olgan tibbiyot xodimlariga bir martalik to‘lov to‘lanishi ko‘rsatilgan.
1-sonli Respublika klinik shifoxonasi ma’muriyati Sog‘liqni saqlash vazirligining 2020-yil 25-noyabrdagi buyrug‘ini bajarish maqsadida 2020-yil 7-dekabr kuni D.Yuldashevaga bir martalik to‘lovlar bo‘yicha 125 million so‘m mablag‘ ajratilishi so‘ralgan.
Shu bois uning shaxsiy hisob raqam kartochkasiga 2020-yil 31-dekabrda 88 million so‘m pul o‘tkazilgan. Qolgan 25 million so‘m yagona ijtimoiy to‘lovga, 11,9 million so‘mi esa jismoniy shaxslardan olinadigan daromad solig‘iga va 100 ming so‘m jamg‘arib boriladigan pensiya badaliga o‘tkazilgan.
O‘rganish jarayonida qonun buzilishi holatiga chek qo‘yilib, D.Yuldashevaga to‘lanmay qolgan 11,9 million so‘m kompensatsiya to‘lab berilishi ta’minlangan.
Mavzuga doir: O‘zbekistonda koronavirusga chalinish holatlari ko‘paygani haqidagi xabarlar asossiz ekanligi ma’lum qilindi
Koronavirus infeksiyasiga qarshi kurashish doirasida bemorlar bilan ishlagan vaqtida koronavirus infeksiyasini yuqtirish natijasida og‘ir ahvolga tushgan va sog‘lig‘i tiklanmagan taqdirda tibbiyot, sanitariya-epidemiologiya xizmati va boshqa xodimlarga yoki ularning oila a’zolariga esa 250 million so‘m miqdorida bir martalik to‘lovlar to‘lanadi.
Izoh (0)