“Barselona” bosh murabbiyi Ronald Kuman La Liga 24-turi doirasida 21-fevral kuni kechgan “Kadis”ga qarshi o‘yindan (1:1) so‘ng o‘z fikrlari bilan o‘rtoqlashdi.
Bu natijaning ko‘ngilni xira qiladigan tomoni shundaki, bunday o‘yinlarda g‘alaba qozonish kerak — biz esa buni uddalay olmadi. “Atletiko” mag‘lubiyatidan keyin yuzaga kelgan juda ajoyib imkoniyatni qo‘ldan chiqardik.“Barselona” 23 ta o‘yinda 47 ochko to‘plab, 3-pog‘onada bormoqda va shuncha o‘yin o‘tkazgan peshqadam “Atletiko”dan 7 ochko ortda qolmoqda. Ikkinchi o‘rindagi “Real” esa 24 o‘yinda 52 ochko to‘plagan.Bu seshanba kungi (PSJga qarshi 1:4) o‘yindan ham ko‘proq hafsalamni pir qildi. Ikki ochko yo‘qotilishiga yo‘l qo‘ymasligimiz kerak edi. Men aynan qaysidir futbolchini aybdor qilishni yomon ko‘raman, biz umumiy holda hujumda yaxshi harakat qilmadik va himoyada ham boshqacha o‘ynashimiz kerak edi. G‘alaba qozonish kerak edi.
Ikkinchi golni urmas ekansan, barcha masalani hal qila olmaysan, raqib esa har doim javob to‘pini kiritadi. Biroq vaziyat yaratishda qiyinchilikka duch keldik, “Kadis” chuqur himoyalandi. Hujumda yorqinlik yetishmadi. Darvozamizga penalti belgilangan vaziyatni tahlil qilib chiqish kerak. Bu menga shubhali ko‘rindi, biroq u jarimaga tortadigan vaziyat ham edi.
Biz hali biror nimaga erisha olish imkoniyatiga egamiz, sababi hech kim osonlikcha g‘alaba qozona olmayapti. Biroq bu o‘yindagidek imkoniyatni qo‘yib yubormaslik kerakligini tushunib yetishimiz kerak. Biz peshqadam bilan farqni qisqartira oldik, biroq nazoratimizda o‘tgan o‘yinda 2 ochko yo‘qotdik. Umumiy olganda “Kadis” bizdan 5 ochko tortib oldi, bunga yo‘l qo‘yish kerak emasdi.
Ronald Kuman, “Barselona” bosh murabbiyi
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)