Toshkent viloyatida 45 kun ichida mast holda avtomobil boshqargan mingdan ortiq haydovchiga chora ko‘rildi

Toshkent viloyatida 45 kun ichida mast holda avtomobil boshqargan mingdan ortiq haydovchiga chora ko‘rildi. Bu haqda viloyati IIBB YHXB axborot xizmati xabar berdi.

Ma’lum qilinishicha, Toshkent viloyati IIBB YHXB va quyi tizim xodimlari tomonidan yo‘l-transport hodisalari va turli ko‘ngilsiz holatlarning oldini olish hamda harakat xavfsizligini ta’minlash maqsadida olib borilgan ishlar, o‘tkazilgan reydlar davomida ko‘pgina huquqbuzarliklar aniqlanib, chora ko‘rilgan.

Jumladan, viloyat hududida bir kunda o‘rtacha 20 tadan ko‘p, ayrim kunlari 50 nafargacha haydovchi mast holda transport boshqargani aniqlangan va tegishli tartibda ma’muriy bayonnomalar rasmiylashtirilgan. Hozirda bu ko‘rsatkich yil boshidan buyon 1017 tani tashkil qilmoqda.

Ma’lumot uchun, haydovchilarning transport vositalarini alkogolli ichimlik, giyohvand modda ta’sirida yoki o‘zgacha tarzda mast holda boshqarishi – BHMning 25 baravari miqdorida jarima solishga hamda transport vositasini boshqarish huquqidan 1 yil-u 6 oydan 3 yilgacha muddatga mahrum etishga sabab bo‘ladi.

Avvalroq O‘zbekistonda 2020-yilda yo‘l-transport hodisalari oqibatida jami 1962 kishi halok bo‘lgani to‘g‘risida xabar berilgandi.