20-fevral kuni Namangan viloyati Chortoq tumanida joylashgan Sulton Uvays Qaraniy ziyoratgohining ochilish marosimi bo‘lib o‘tdi, deb xabar beradi Din ishlari bo‘yicha qo‘mita matbuot xizmati.
Tantanali marosimda Namangan viloyati hokimligi, Vazirlar Mahkamasi huzuridagi Din ishlari bo‘yicha qo‘mita, Turizmni rivojlantirish davlat qo‘mitasi, O‘zbekiston musulmonlari idorasi vakillari qatnashgan.
Ma’lumot uchun, Sulton Uvays Qaraniy ziyoratgohi Chortoq tuman markazidan 35 kilometr uzoqlikdagi Baliqli ko‘l qishlog‘ida joylashgan. Ziyoratgohda islom olamining tabarruk avliyolaridan biri Sulton Uvays Qaraniyning maqbaralari mavjud.
O‘zbekiston Prezidentining 2017-yil 7-iyul kuni Uvays Qaraniy ziyoratgohiga tashrifidan so‘ng, ziyoratgohning 6 gektar maydonida obodonlashtirish va ko‘kalamzorlashtirish ishlari amalga oshirilib, 1500 tupdan ortiq manzarali daraxtlar va gul ko‘chatlari ekilgan. Sulton Uvays Qaraniy maqbarasi to‘liq qayta qurilgan. 1400 o‘ringa mo‘ljallangan masjid va tahoratxona, maqbara yonida ayvon, zamonaviy mehmonxona, milliy muzey va kutubxona, 3 ta favvora, dam olish ayvonlari va xizmat ko‘rsatish shoxobchalari bunyod etilgan.
Shuningdek, Uvays Qaraniy ziyoratgohining janubiy tomonida onalari Bibi Naima ona ziyoratgohi joylashgan. Bibi Naima ona ziyoratgohida ham qurilish va bunyodkorlik ishlari amalga oshirilgan: 4 gektar maydon obodonlashtirilib, 1000 tupdan ortiq manzarali daraxtlar ekilgan.
Mavzuga doir:
- Namangandagi Sulton Uvays Qaraniy ziyoratgohi (foto)
- Chiroqchida 300 yillik tarixga ega masjid soxta hujjatlar bilan yopildi. Aholi buni masjid imomiga nikoh o‘qitmay qo‘yganlik uchun jazo deb hisoblamoqda
- Namanganda hajmi jihatdan Qur’oni Usmoniydan keyin ikkinchi o‘rinda turadigan Mus’haf saqlanmoqda
Izoh (0)