Qashqadaryo viloyatining Shahrisabz shahrida faoliyat yurituvchi tadbirkor o‘z mablag‘i hisobidan maishiy xizmat uyi barpo etib, 20 ta yangi ish o‘rni yaratishni niyat qilgan. Biroq mazkur obyektni qurish uchun 8 sotix yer ololmay, sarson bo‘lmoqda.
Bu haqda “Daryo”ga shikoyat qilgan tadbirkor Umida Kurayevaning aytishicha, tadbirkorda avvalroq yer ham bo‘lgan.
“Biroq, biz qurilishni boshlamoqchi bo‘lgan Shahrisabz shahridagi ‘Teparlik’ mahallasidagi 8 sotix yerga ijtimoiy ahvoli og‘ir fuqaro issiqxona qurmoqchi bo‘lib, davlatdan kredit olgan ekan. Bu ishlarni boshlab qo‘ygan shaharning sobiq hokimi To‘lqin Karimov muammoni yechish uchun bizning yerdan voz kechishimizni va evaziga o‘zimiz xohlagan joydan 8 sotix yer ajratib berishini aytdi. Hokimning gapiga ishonib, uning aytganini qildim. Va boshqa manzildan yer tanladim”, — deydi tadbirkor Umida Kurayeva.
Umida Kurayevaning aytishicha, shaharning sobiq hokimi To‘lqin Karimov unga boshqa joydan yer va’da qilib, hujjatli yeridan voz kechdirgach u uchun ko‘rsatilgan yerni hujjatlashtirishni paysalga sola boshlagan.
“Hokim va’da qilgan yerdan 8 sotix yer ajratib olib, barcha hujjatlashtirish ishlarini tugatdik. Faqat hokim imzosi qoldi. Hokim ‘bugun imzo chekaman, erta imzo chekaman’, deb boshqa ishga o‘tib ketdi. Oqibatda biz yersiz, ish boshlolmay qoldik. Shaharda yangi hokim ish boshlagach hokim Akrom Sulaymonov qabulida bo‘lib, 20 ta yangi ish o‘rni yaratmoqchiligimni, sobiq hokim gapiga ishonib, avvalgi yerimdan ajralib qolganimni, yangi yerni hujjatlashtirish ishlari esa yakunlanmagani sabab qurilish boshlolmayotganimni bildirdim va yordam so‘radim”, — deydi tadbirkor.
“Daryo” muxbiri tadbirkor muammosi bilan 2020-yil dekabr oyi boshida hokim qabulida bo‘lganida Akrom Sulaymonov lavozimga yangi tayinlanganini, hali masaladan bexabarligini aytib, muammoni o‘rganish uchun vaqt so‘ragandi. Va muammodan bexabarligi sabab OAVga intervyu berishdan bosh tortgandi.
“Ish boshlaganimga endigina bir hafta bo‘ldi. Muammo bilan tanishib chiqib, tadbirkor muammosini yechamiz”, — degandi hokim muxbir bilan suhbatda.
Murojaatchi tadbirkorning aytishicha, yangi hokim va’dasi ham o‘sha payt aytilgan va o‘sha joyda qolib ketgan.
“Hokim muammoni o‘rganishini va ijobiy hal etishini va’da bergan bo‘lsa-da, o‘rganmadi. Hatto biror marta yoniga chaqirib, muammongiz nima bo‘ldi? Yangi ish o‘rni yaratmoqchi ekansiz, qanday yordamimiz kerak, deb so‘ramadi ham”, — deydi tadbirkor Umida Kurayeva.
Shahrisabz shahar hokimligi yuristi Maqsud Ismatovning ma’lum qilishicha, tadbirkor Umida Kurayevaning qarindoshi Axtam To‘rayevga 2018-yil 25-iyun kuni aholiga savdo va xizmat ko‘rsatish binosini qurish uchun 910 kvadrat\metr yer maydoni ajratib berilgan.
“Aynan shu yerni sobiq hokim To‘lqin Karimov ijtimoiy og‘ir ahvoldagi fuqaroga bergan va uning issiqxona qurishi uchun ruxsat qilgan. Vaholanki, bu ish noqonuniy. Ammo o‘sha fuqaro ahovolini ham tushunishga harakat qilyapmiz. Biz undan yerni tortib olsak, davlatdan olgan krediti va qurgan issiqxonasini buzishga to‘g‘ri keladi. Bu esa fuqaroga zarar”, — deydi tadbirkor Umida Kurayeva.
Shahrisabz shahar hokimligi qurilish bo‘limi mas’ullarining aytishicha, tadbirkor Axtam To‘rayevga, ya’ni uning vakili Umida Kurayevaga berilgan yer aslida tadbirkorning eski do‘koni qurilgan yer davlat manfaatlari uchun olib qo‘yilgani sabab berilgan.
“Eng qizig‘i, o‘zimizning do‘konimiz uchun berilgan yerdan hokim va’dasiga ishonib, kechdik. Ijtimoiy og‘ir ahvoldagi fuqaro uchun berdik. Endilikda esa maishiy savdo uyi qurish uchun yer ololmay, sarsonmiz. Sobiq hokim ham, yangi hokim Akrom Sulaymonov ham yangi ish o‘rni yaratmoqchi bo‘lgan tadbirkorni qo‘llab-quvvatlash o‘rniga, bizni sarson-sargardon qilmoqda. Vaholanki, davlat rahbarining bugungi kun hokimlariga qo‘ygan asosiy talabi — tadbirkorni qo‘llab-quvvatlash va tadbirkor orqali yangi ish o‘rinlari yaratib, xalq farovonligini ta’minlashdan iborat. Xo‘sh, Shahrisabzda Prezidentning bu talabi bajarilmaydimi?”, — deydi tadbirkor Umida Kurayeva.
Shahrisabz shahar hokimligi mazkur muammoga e’tibor qaratadi degan umiddamiz. “Daryo” voqealar rivojini kuzatishda davom etadi.
Izoh (0)