O‘zbekistonda 2020-yilda yo‘l-transport hodisalari oqibatida jami 1962 kishi halok bo‘ldi
O‘zbekistonda 2020-yilda yo‘l-transport hodisalari oqibatida jami 1962 kishi halok bo‘ldi. Bu haqda AOKAda IIV YHXBB rahbar va mutasaddilari ishtirokida o‘tkazilayotgan matbuot anjumani doirasida ma’lum qilindi.
Ta’kidlanishicha, ushbu ko‘rsatkich 2019-yilga nisbatan 6,3 foizga kam. Ya’ni 2019-yilda yo‘l-transport hodisalari oqibatida halok bo‘lganlar soni 2094 nafarni tashkil etgan.
“Vazirlik tashabbusi bilan maktab o‘quvchilariga ‘Yo‘l harakati qoidalari’ni o‘rgatish uchun ‘Harakat xavfsizligi sinfxonalari’ hamda ‘Yo‘l harakatini o‘rganish maydonchalari’ tashkil etildi. Yana bir qulaylik: ‘Ma’muriy amaliyot’ KAAT hamda ‘Dyhxx.uz’ sayti orqali vaqtinchalik jarima maydoniga joylashtirilgan transport vositasini masofadan turib olib chiqishning elektron tartibi joriy etildi”, — deyiladi xabarda.
“Gazeta.uz”ning yozishicha, mamlakatda 2020-yilda jami YTHlar soni 2019-yilga nisbatan 13,7 foizga kamayib, 6982 tani tashkil etgan. Shundan o‘lim bilan bog‘liq holatlar soni 1689 ta. YTHlar oqibatida jarohatlanganlar soni esa o‘tgan yilga nisbatan 16,8 foizga kamayib, 6591 nafarga teng.
