O‘zbekistonda tez tibbiy yordamning bir marta tashrifi o‘rtacha 150 ming so‘mga tushadi, chaqiruvlarning deyarli yarmi esa noto‘g‘ri chaqiruvlardir. Bu haqda sog‘liqni saqlash vaziri o‘rinbosari Abdulla Azizov “O‘zbekiston 24” telekanaliga bergan intervyusida ma’lum qildi.
“O‘zbekistonda surunkali kasalligi bo‘lgan ko‘plab bemorlar oilaviy shifokori yoki poliklinikaga borib olishi mumkin bo‘lgan muolajani qilmasdan, 103 ga telefon qilib, shu orqali muammolarini hal qilishga harakat qilishadi. Yevropada surunkali kasalligi bo‘lganlar hech qachon 103 ga telefon qilmaydi.
Butun chaqiruvlarning 40 foizi surunkali kasalligi bo‘lganlar hisobiga to‘g‘ri keladi. Bu, albatta, chaqiruvlarning qanchalik noto‘g‘ri ekanligidan dalolat beradi”, – deydi vazir o‘rinbosari.
“Har bitta mashinani bir xonadonga borib, qaytishi xarajati o‘rtacha 150 ming so‘mga to‘g‘ri keladi. Albatta, bu budjetga yana qo‘shimcha yuklama tushishi degani. Bu bo‘yicha xalqimiz orasida keng jamoatchilik ishlarini olib borishimiz kerak”, – qo‘shimcha qildi Abdulla Azizov.
Vazir o‘rinbosari tez yordamning kech qolish sabablariga ham to‘xtaldi.
“Toshkent misolida oladigan bo‘lsak, ko‘pincha kechikishga asosiy sabab — bu yo‘llardagi tirbandlik. Boshqa rivojlangan davlatlarda ko‘p haydovchilar tez yordam mashinasiga darhol yo‘l beradi. Bizda esa ko‘pincha tez yordam mashinasiga yo‘lini ochib berishmaydi”, – deydi u.
Vazir o‘rinbosarining ta’kidlashicha, Toshkent shahrida 3 mingta murojaatchidan atigi 500 tasi (18 foizi) shifoxonaga yotqiziladi. Rivojlangan davlatlarda bu raqam 80-90 foizni tashkil qiladi.
Shuningdek, ko‘p qavatli uylar atrofida noto‘g‘ri “parkovka” qilingan avtomobillar tez yordam mashinasi kirishiga noqulaylik yaratadi.
U keltirilgan muammolarni hal qilish uchun ijtimoiy roliklar tayyorlash kerakligi yoki videoregistrator orqali yo‘l bermagan haydovchilarni qonuniy tomondan jarimaga tortishni ilgari surdi.
Bundan avval Toshkentda tez yordam, o‘t o‘chirish mashinalari va avtobuslar uchun alohida yo‘laklar tashkil etilishi hamda O‘zbekistonda tez tibbiy yordam tizimiga jalb qilingan maxsus avtomobillar soni ma’lum qilingani haqida xabar berilgandi.
Izoh (0)