Argentina sog‘liqni saqlash vaziri Xines Gonsales Garsia iste’foga chiqdi. Avvalroq mahalliy OAV ba’zi yuqori martabali amaldorlar va deputatlar COVID-19’ga qarshi navbatsiz emlangani haqida ma’lumot bergan, deb yozmoqda “Kommersant.ru”.
“Men argentinaliklarni federal sog‘liqni saqlash tizimini yanada tenglik, erkinlik va sifatni tiklash bo‘yicha olib borayotgan siyosatimizga sodiqligi va qo‘llab-quvvatlashini alohida e’tirof etaman” — deb yozdi sog‘liqni saqlash vaziri Twitter sahifasida.
Shuningdek, janob Garsia iste’fosi haqida prezidentga yozgan murojaatini ham e’lon qildi. Murojaatda mansabdor shaxslarning umumiy vaksinatsiya rejasiga kiritilishi bexosdan yo‘l qo‘yilgan anglashilmovchilik ekani aytilgan.
Mamlakatning yangi sog‘liqni saqlash vaziri etib Karlos Vissotti tayinlandi. Bungacha u sog‘liqni saqlash xizmatlari masalasi bo‘yicha vazir o‘rinbosari vazifasida ishlagan.
Avvalroq bir nechta mahalliy OAV mamlakat Sog‘liqni saqlash vazirligini vaksinani birinchi navbatda olganlar orasida siyosatchilar ham bor deb ayblagan edi. Clarin nashri vaksina olgan yuqori lavozimli amaldorlarning to‘liq ro‘yxatini e’lon qilgan.
Argentinada vaksinatsiya 2020-yilning oxirida boshlangan edi. Mamlakatda emlash uchun “Sputnik V” vaksinasi ma’qullangan. Birinchi bo‘lib tibbiyot xodimlari emlangan. Hozir 80 yoshdan oshgan fuqarolar vaksina olishda imtiyozlarga ega. So‘nggi ma’lumotlarga ko‘ra, mamlakat aholisining 0,8 foizi (372 ming kishi) emlangan.
Jons Hopkins universiteti ma’lumotlariga ko‘ra, pandemiya boshidan buyon Argentinada koronavirusga chalinganlar soni 2 054 681 kishini tashkil qilgan, 51 ming kishi kasallik oqibatida vafot etgan.
Izoh (0)