Аргентина соғлиқни сақлаш вазири Хинес Гонсалес Гарсиа истеъфога чиқди. Аввалроқ маҳаллий ОАВ баъзи юқори мартабали амалдорлар ва депутатлар COVID-19’га қарши навбатсиз эмлангани ҳақида маълумот берган, деб ёзмоқда «Kommersant.ru».
«Мен аргентиналикларни федерал соғлиқни сақлаш тизимини янада тенглик, эркинлик ва сифатни тиклаш бўйича олиб бораётган сиёсатимизга содиқлиги ва қўллаб-қувватлашини алоҳида эътироф этаман» — деб ёзди соғлиқни сақлаш вазири Twitter саҳифасида.
Шунингдек, жаноб Гарсиа истеъфоси ҳақида президентга ёзган мурожаатини ҳам эълон қилди. Мурожаатда мансабдор шахсларнинг умумий вакцинация режасига киритилиши бехосдан йўл қўйилган англашилмовчилик экани айтилган.
Мамлакатнинг янги соғлиқни сақлаш вазири этиб Карлос Виссотти тайинланди. Бунгача у соғлиқни сақлаш хизматлари масаласи бўйича вазир ўринбосари вазифасида ишлаган.
Аввалроқ бир нечта маҳаллий ОАВ мамлакат Соғлиқни сақлаш вазирлигини вакцинани биринчи навбатда олганлар орасида сиёсатчилар ҳам бор деб айблаган эди. Clarin нашри вакцина олган юқори лавозимли амалдорларнинг тўлиқ рўйхатини эълон қилган.
Аргентинада вакцинация 2020 йилнинг охирида бошланган эди. Мамлакатда эмлаш учун «Спутник V» вакцинаси маъқулланган. Биринчи бўлиб тиббиёт ходимлари эмланган. Ҳозир 80 ёшдан ошган фуқаролар вакцина олишда имтиёзларга эга. Сўнгги маълумотларга кўра, мамлакат аҳолисининг 0,8 фоизи (372 минг киши) эмланган.
Жонс Ҳопкинс университети маълумотларига кўра, пандемия бошидан буён Аргентинада коронавирусга чалинганлар сони 2 054 681 кишини ташкил қилган, 51 минг киши касаллик оқибатида вафот этган.
Изоҳ (0)