Ukraina Milliy xavfsizlik va mudofaa kengashi (MXMK) tomonidan Oliy Rada deputati va “Muxolifat platforma — Hayot uchun” partiyasi yetakchisi, “Putinning otasi” nomi bilan tanilgan Viktor Medvedchukka qarshi sanksiyalar joriy qilindi. Bu haqda MXMK kotibi Aleksey Danilovga tayanib, Meduza xabar berdi.
Aleksey Danilovning so‘zlariga ko‘ra, Medvedchuk va uning turmush o‘rtog‘i Oksana Marchenko uch yil muddatga sanksiyalar joriy qilingan sakkiz kishilik ro‘yxatga kiritildi. Shuningdek, ushbu ro‘yxatdan 19 ta yuridik shaxs ham o‘rin olgan. Cheklovlar Ukraina Xavfsizlik xizmatining (SBU) terrorizmni moliyalashtirish bo‘yicha surishtiruv ishlari bilan bog‘liq.
Xususan, sanksiyalarda Medvedchuk va Marchenkoning aktivlarini garovga olish ko‘zda tutilgan. Danilov ro‘yxatning to‘liq tarkibini ochiqlamadi. Uning ta’kidlashicha, tarkib Ukraina prezidenti Vladimir Zelenskiy farmoni matnida to‘liq e’lon qilinadi. Mamlakat prezidenti saytida hozircha bunday farmon mavjud emas.
“Hozircha bu masalani o‘rganyapmiz”, — dedi partiya raisdoshi Yuriy Boyko MXMK qarori haqida “RBK” nashriga bergan izohida.
Yanvar oyi oxirida Ukraina prezidenti Vladimir Zelenskiy MXMKning Rossiyaning yuridik va jismoniy shaxslariga qarshi yakka tartibda sanksiyalar kiritish qarorini kuchga kiritgan edi.
Shuningdek, Ukraina Rossiyaning “Sputnik V” vaksinasini ro‘yxatdan o‘tkazishdan bosh tortgan. Ukraina sog‘liqni saqlash vaziri Maksim Stepanovning aytishicha “qaysidir siyosiy kuch Rossiya vaksinasini ro‘yxatdan o‘tkazish masalasida qandaydir vasvasa keltirib chiqargan”, ammo Kiyev “Sputnik V”ni ro‘yxatdan o‘tkazmaydi.
Avvalroq Yevropa Ittifoqi Belarusga qarshi to‘rtinchi sanksiyalar paketini ishlab chiqayotgani va rossiyalik muxolifatchi Aleksandr Navalniyning qamoqqa olinishiga aloqadorlarga nisbatan cheklovlar joriy etishni nazarda tutuvchi “Navalniy ro‘yxati” muhokama qilinayotgani haqida xabar berilgandi.
Izoh (0)