AQSh janubida yashovchi aholi bir haftadan buyon mazkur hudud uchun anchayin noodatiy bo‘lgan juda sovuq ob-havo asoratlariga qarshi kurash olib bormoqda. Havo harorati 18 darajagacha tushib ketgan. Kamida 47 nafar odam sovuq oqibatida halok bo‘lgan, 4 milliondan ziyod uy xo‘jaliklari issiqlik va elektr energiyasi ta’minotidan uzilib qolgan. “RBK”ning fotoreportajida AQSh janubidagi qahraton oqibatida yashab qolish uchun kurashayotgan odamlar haqida bilib olish mumkin.
Texasda oxirgi 30 yil ichidagi eng past harorat qayd etildi (simob ustuni -18 darajagacha tushib ketgan) va favqulodda holat e’lon qilindi. Havoning keskin sovishi tufayli elektr energiyasi ta’minoti tizimida katta uzilishlar qayd qilindi.
Blekaut Texasdagi kamida 4,3 millionta uy va ofislarga ta’sir qilgan. 19-fevral holatiga ko‘ra, shtatdagi 200 mingta uy xo‘jaligi elektr ta’minotidan uzilgan. 13 million nafar texasliklar issiq suvsiz qolgan.
Elektr energiyasidagi muammolardan tashqari, Texasda oziq-ovqat mahsulotlarini yetkazib berish bilan bog‘liq xizmatlarida ham to‘xtalishlar uchragan.
Kamida 47 nafar odam noqulay ob-havoning qurboniga aylandi, shundan 30 nafari Texas shtatining fuqarolaridir. The Washington Post nashrining yozishicha, mazkur raqamga sovuqda qolib ketib vafot etganlar yoki o‘limiga shunday gumon bilan taxminiy tashxis qo‘yilgan odamlar kiritilgan.
19-fevralda elektr tizimlarida uzilishlar kuzatilgani tufayli hukumat Meksika ko‘rfazi sohillari yaqinidagi Galveston hamda Korpus-Kristi shaharlariga zaxira oziq-ovqatlar ortilgan ikkita harbiy samolyot yuborishga majbur bo‘ldi.
Texas rasmiylari ob-havoning bunday keskin sovib ketishi yana ham jiddiy oqibatlar olib kelishi mumkin bo‘lganini qayd etgan. Shuningdek, ular anomal iqlim sovishi va kuchli qor bo‘roniga oldindan tayyorgarlik ko‘rilmaganini ham tan olgan.
Oklaxomada kuzatilgan kuchli sovuq iqlim, qor bo‘ronlari va muz yomg‘irlari gubernatorni federal darajada yordam so‘rashga majbur qildi.
19-fevralda mamlakat janubida havoning bir oz bo‘lsa ham, iligani sezilgan, muzlagan yerlar asta-sekin erishi, havo harorat ko‘tarilishi va 10 daraja iliqqacha chiqishi kutilmoqda. Shu kuni muzli bo‘ron Dallas va Nyu-Yorkga qarab yo‘nalgan.
Izoh (0)