AQSh kelasi hafta 2018-yilda saudiyalik muxolifatchi jurnalist Jamol Qoshiqchining o‘ldirilishi to‘g‘risida hisobotni e’lon qiladi, deb xabar berdi Tengrinews nashri “RIA Novosti”ga asoslanib.
The Washington Post nashri manbalariga tayanib xabar berishicha, hisobot AQSh Milliy razvedkasi direktori idorasi tomonidan nashr etiladi. Nashrning ta’kidlashicha, maxfiy ma’lumotlarni o‘z ichiga olmagan hujjatda jurnalistni o‘ldirish qirollik valiahdi – shahzoda Muhammad ibn Salmon tomonidan “buyurtma qilingan”i keltirib o‘tilgan.
Kongress 2019-yil boshida ma’muriyatga bu ish yuzasidan hisobot e’lon qilishni talab qildi, ammo sobiq prezident Donald Tramp bu talabni e’tiborsiz qoldirdi. Nashr hujjatning e’lon qilinishini Jo Baydenning saylovoldi kampaniyasida va’da qilingan oshkoralik siyosati bilan bog‘ladi. Bundan tashqari, yangi prezident voqea yuzasidan huquq himoyachilarining da’volariga duch kelmoqda.
Nashrning ta’kidlashicha, hisobotning chop etilishi Amerika tomoni qirollikka qurol sotishni to‘xtatgani sabab taranglashgan AQSh va Saudiya Arabiston munosabatlarning yanada yomonlashishiga olib keladi.
Eslatib o‘tamiz, Jamol Qoshiqchi The Washington Post jurnalisti bo‘lgan va o‘z maqolalarida Saudiya Arabistoni hukumatini tanqid qilgan. U 2018-yilning oktabr oyida Saudiya Arabistonining Istanbuldagi elchixonasida o‘ldirilgan. Uning jasadi hozirgacha topilmagan.
Turkiya hukumati, AQSh Senati va Markaziy razvedka boshqarmasi jurnalistni o‘ldirish haqidagi buyruqni Saudiya Arabistonining merosxo‘r shahzodasi Muhammad ibn Salmon berganligini ma’lum qilgan. Saudiya Arabistoni hukumati esa jurnalistning o‘limini kuch tuzilmalarining shaxsiy tashabbusi deb atagan.
Jinoyatda gumonlanganlar Saudiya Arabistoni sudiga topshirilgan. 2019-yilning dekabr oyida ularning besh nafari o‘lim jazosiga hukm qilingan, yana uch nafariga tayinlangan qamoq jazosining umumiy muddati 24 yilni tashkil etgan.
2020-yilning sentabrida besh kishiga tayinlangan o‘lim jazosi jurnalistning o‘g‘illari so‘roviga asosan qamoq jazosiga almashtirilgan. 2020-yilning may oyida jurnalistning o‘g‘illari otasining o‘limida aybdor bo‘lganlarni kechirishini ma’lum qilgan. Biroq jurnalistning do‘sti Qoshiqchining o‘g‘illari aybdorlarni kechirish haqida o‘z ixtiyori bilan ma’lum qilganiga shubha bildirgan.
Izoh (0)