АҚШ келаси ҳафта 2018 йилда саудиялик мухолифатчи журналист Жамол Қошиқчининг ўлдирилиши тўғрисида ҳисоботни эълон қилади, деб хабар берди Tengrinews нашри «РИА Новости»га асосланиб.
The Washington Post нашри манбаларига таяниб хабар беришича, ҳисобот АҚШ Миллий разведкаси директори идораси томонидан нашр этилади. Нашрнинг таъкидлашича, махфий маълумотларни ўз ичига олмаган ҳужжатда журналистни ўлдириш қироллик валиаҳди – шаҳзода Муҳаммад ибн Салмон томонидан «буюртма қилинган»и келтириб ўтилган.
Конгресс 2019 йил бошида маъмуриятга бу иш юзасидан ҳисобот эълон қилишни талаб қилди, аммо собиқ президент Дональд Трамп бу талабни эътиборсиз қолдирди. Нашр ҳужжатнинг эълон қилинишини Жо Байденнинг сайловолди кампаниясида ваъда қилинган ошкоралик сиёсати билан боғлади. Бундан ташқари, янги президент воқеа юзасидан ҳуқуқ ҳимоячиларининг даъволарига дуч келмоқда.
Нашрнинг таъкидлашича, ҳисоботнинг чоп этилиши Америка томони қиролликка қурол сотишни тўхтатгани сабаб таранглашган АҚШ ва Саудия Арабистон муносабатларнинг янада ёмонлашишига олиб келади.
Эслатиб ўтамиз, Жамол Қошиқчи The Washington Post журналисти бўлган ва ўз мақолаларида Саудия Арабистони ҳукуматини танқид қилган. У 2018 йилнинг октябрь ойида Саудия Арабистонининг Истанбулдаги элчихонасида ўлдирилган. Унинг жасади ҳозиргача топилмаган.
Туркия ҳукумати, АҚШ Сенати ва Марказий разведка бошқармаси журналистни ўлдириш ҳақидаги буйруқни Саудия Арабистонининг меросхўр шаҳзодаси Муҳаммад ибн Салмон берганлигини маълум қилган. Саудия Арабистони ҳукумати эса журналистнинг ўлимини куч тузилмаларининг шахсий ташаббуси деб атаган.
Жиноятда гумонланганлар Саудия Арабистони судига топширилган. 2019 йилнинг декабрь ойида уларнинг беш нафари ўлим жазосига ҳукм қилинган, яна уч нафарига тайинланган қамоқ жазосининг умумий муддати 24 йилни ташкил этган.
2020 йилнинг сентябрида беш кишига тайинланган ўлим жазоси журналистнинг ўғиллари сўровига асосан қамоқ жазосига алмаштирилган. 2020 йилнинг май ойида журналистнинг ўғиллари отасининг ўлимида айбдор бўлганларни кечиришини маълум қилган. Бироқ журналистнинг дўсти Қошиқчининг ўғиллари айбдорларни кечириш ҳақида ўз ихтиёри билан маълум қилганига шубҳа билдирган.
Изоҳ (0)