Germaniyaning BioNTech kompaniyasi bilan hamkorlikda koronavirusga qarshi vaksina ishlab chiqqan Amerikaning Pfizer kompaniyasi homilador ayollar orasida preparatning xavfsizligi va samaradorligini klinik sinovlardan o‘tkazishni boshladi. Bu haqda Reuters xabar berdi.
Klinik sinovlarda 18 yoshdan oshgan, homiladorlik muddati 24-34 haftani tashkil etayotgan 4 mingga yaqin ayollar ishtirok etmoqda. Tadqiqotning maqsadi 21 kunlik oraliqda berilgan ikki dozali vaksina yoki platseboning xavfsizligi, bardoshliligi va immunogenligini baholashdan iborat.
Olimlar vaksinaning bola uchun xavfsizligini baholash uchun 7-10 oy davomida tajriba ishtirokchilarining homiladorlik va tug‘ish jarayonini kuzatadi. Chaqaloqlar tug‘ilganidan so‘ng, taxminan, olti oy davomida nazorat ostida bo‘ladi. Bundan tashqari, kompaniya ta’kidlaganidek, platsebo olgan ishtirokchilar bola tug‘ilgandan so‘ng emlanishi mumkin.
“Biz ushbu tadqiqotni boshlab, homilador ayollar uchun emlashning xavfsizligi va samaradorligi hamda vaksinaning ushbu muhim toifa — homiladorlar uchun doimiy qo‘llash mumkinligi to‘g‘risida dalillarni to‘plashdan mamnunmiz”,— dedi Pfizer klinik tadqiqotlar bo‘yicha vitse-prezident Uilyam Graber.
Uning qo‘shimcha qilishicha, homilador ayollar koronavirusga chalinsa, ularda asoratlar qolishi va kasallik og‘ir kechishi xavfi yuqoriroq.
Jahon sog‘liqni saqlash tashkiloti (JSST) Immunizatsiya va vaksinalar bo‘limi direktori Keyt O’Brayen o‘z navbatida Pfizer va Moderna singari RNKga asoslangan koronavirusga qarshi vaksinalar homilador ayollar uchun xavf tug‘diradi, deb ishonishga hech qanday asos yo‘qligini aytdi. Shu bilan birga, vaksinalarning homiladorlik va homilador ayollarga ta’siri haqidagi ma’lumotlar qat’iy bayonot berish uchun yetarli emas.
Pfizer va BioNTech 2021-yil oxiriga qadar, keyingi bir necha oy ichida 5 yoshgacha, shuningdek, 5 yoshdan 11 yoshgacha bo‘lgan bolalarda emlash samaradorligi bo‘yicha qo‘shimcha tadqiqotlar boshlashni niyat qilmoqda.
Avvalroq Moskvadagi shifoxona bazasida “Sputnik V” vaksinasining 14-18 yoshlilar uchun uch bosqichli tadqiqotlari amalga oshirilishi haqida xabar berilgandi. Natijalarga qarab o‘smirlar vaksinatsiya dasturiga kiritilishi mumkin.
Bundan tashqari, Rossiyada “Sputnik V” vaksinasining burunga tomiziladigan shakli va yangi “Sputnik Layt” vaksinasi sinovdan o‘tkaziladi.
Izoh (0)