Qashqadaryo hokimi Zoir Mirzayevning qarori elektron raqamli imzo orqali birorta qog‘oz ishlatilmasdan “E-qaror” elektron tizimi orqali qabul qilingan O‘zbekistondagi birinchi viloyat hokimining rasmiy qaroriga aylandi. Bu haqda “Yuz.uz” xabar berdi.
Ma’lum qilinishicha, yangi onlayn dasturning ustunlik tomonlari, chiqarilayotgan qarorlar to‘g‘ridan to‘g‘ri “E-qaror” tizimi orqali keng jamoatchilik bemalol kuzatib borishi mumkin.
Ta’kidlanishicha, “E-qaror” elektron tizimini respublikaning barcha mahalliy davlat hokimiyati organlarida joriy etilishi ularning faoliyati va ish yurituvi shaffoflashishiga, fuqarolarning konstitutsiyaviy huquq va erkinliklari poymol bo‘lishini oldlini olishga, shuningdek, tadbirkorlik subyektlari uchun asossiz xarajatlarni keltirib chiqaruvchi ortiqcha ma’muriy hamda boshqa cheklovlarni joriy etadigan normalar o‘rnatilishining oldini olishga xizmat qiladi.
Eslatib o‘tamiz, noqonuniy hujjatlar qabul qilinishining oldini olish, hokimliklar faoliyati ochiq va oshkoraligini ta’minlash, sohaga zamonaviy axborot kommunikatsiya texnologiyalarini joriy etish maqsadida Vazirlar Mahkamasining 2020-yil 14-apreldagi 218-son “Mahalliy ijro etuvchi hokimiyat organlari tomonidan qabul qilinadigan qarorlarni ishlab chiqish, kelishish va ro‘yxatdan o‘tkazishning yagona elektron tizimini joriy etish chora-tadbirlari to‘g‘risida”gi qarori qabul qilingan.
Qarorga asosan mahalliy ijro etuvchi hokimiyat organlarining qarorlarini ishlab chiqish, kelishish va ro‘yxatdan o‘tkazishning yagona elektron — “E-qaror” 2021-yilning yanvar—may oylarida Qashqadaryo viloyatida aprobatsiya qilish yuzasidan huquqiy eksperiment o‘tkazilishi, 2021-yil 1-iyuldan boshlab huquqiy eksperiment natijalari asosida “E-qaror” elektron tizimi respublikaning barcha darajadagi mahalliy ijro etuvchi hokimiyat organlarida joriy etilishi belgilangan.
Izoh (0)