O‘zbekistonda o‘tgan bir yil ichida 262,6 mlrd so‘mlik chiroyli avtoraqamlar sotildi

2020-yil boshidan buyon Respublika tovar-xomashyo birjasining “Avtoraqam.uzex.uz” veb-saytida 262,6 milliard so‘mlik 106 mingdan ziyod avtoraqamlar shaffof onlayn-auksionlar orqali sotildi. Avtoraqamlarning sotuvi son jihatdan 2,6 marta, hajmi bo‘yicha esa 71,2 foizga o‘sgan. Bu haqda birja matbuot xizmati xabar berdi.

Tuzilgan bitta bitimning o‘rtacha qiymati 2,4 million so‘mni tashkil etgan. Sotilgan avtoraqamlarning 92,3 foizi jismoniy shaxslar, 7,7 foizi – yuridik shaxslar tomonidan xarid qilingan. O‘tgan davrda sotilgan avtoraqamlarning eng past bahosi – 450 ming so‘mni, eng qimmat avtoraqamning qiymati esa 206,7 million so‘mni tashkil qilgani aytilmoqda.

Raqobatli savdolar natijasida bitimlarning 30 foizi birinchi toifadagi avtoraqamlar, 33,5 foizi – ikkinchi, 19,3 foizi – uchinchi, 5,9 foizi – to‘rtinchi, 5,4 foizi – beshinchi va 5,9 foizi – oltinchi toifa avtoraqamlarga to‘g‘ri kelgan.

Eslatib o‘tamiz, avtoraqamlarni onlayn-auksionlarda sotilishidan kelib tushgan mablag‘larning 80 foizi davlat budjetiga, 20 foizi Ichki ishlar vazirligining moddiy-texnik bazasini rivojlantirish, xodimlarini moddiy rag‘batlantirish va boshqa xarajatlar maxsus jamg‘armasiga yo‘naltiriladi.

Ma’lumot uchun, 2019-yilda onlayn auksionlar orqali 156,1 milliard so‘mlik chiroyli raqamlar sotilgandi.