Shavkat Mirziyoyev Namangan shahrida joylashgan keksa va nogironlar internat uyiga tashrif buyurdi, deya xabar bermoqda “Daryo” muxbiri.
Ma’lum qilinishicha, internatda 14 nafar qariya yashaydi. Ularning 9 nafari erkak, 5 nafari esa ayol. Qariyalarning eng kichigi 60 yosh, eng kattasi 87 yosh. Ularning 4 nafari 1 va 2- guruh nogironi hisoblanadi.
Bino avval paxta tozalash zavodining dala hovlisi bo‘lgan. 2017-yilda 14 nafar qariyani Farg‘onaga ko‘chiramiz, deyishgach ular rozi bo‘lmagan va Prezidentga maktub yo‘llagan.
Shavkat Mirziyoyev bu yerda yashovchi nuroniylar bilan suhbatlashdi.
“Menga O‘zbekistonning har bir fuqarosi birdek qadrli. Sizlarga sog‘liq va uzoq umr tilayman. Bugun juda og‘ir kun bo‘ldi, ko‘p masalalarni muhokama qildik. Samolyotga o‘tirib, qaytish oldidan ko‘nglimdan sizlar o‘tdingiz. O‘z ko‘zim bilan ko‘rib, uzoq yillik muammoni hal qilmasak bo‘lmasdi.
Menga “Saxovat” uylariga ehtiyoji bo‘lgan nuroniylardan juda ko‘p xatlar keladi. Shularni inobatga olib, ijtimoiy himoyani kuchaytiramiz. 4 oy ichida Namangan shahrida “Saxovat” uyi uchun yangi bino qurib beriladi. Sizlar munosib sharoitlarda yashaysiz, davolanasiz.
Hammangiz yangi binoga ko‘chib o‘tganingizda sizlarga maqbul bo‘ldimi, yo‘qmi, albatta, menga xabar bering”, – dedi Shavkat Mirziyoyev.
Bundan avval yangi kutubxonaga ketayotgan Shavkat Mirziyoyev korteji yo‘nalishini o‘zgartirib, “Bunyodkor” mahallasiga kirgani hamda Prezident xalq bilan uchrashgani, Namangandagi 26-sonli mehribonlik uyini borib ko‘rgani va Namangan shahri hokimi va “Bunyodkor” mahallasiga mas’ul prokurorga tanbeh bergani haqida xabar berilgandi.
Izoh (0)